რუსეთის საგარეო საქმეთა სამინისტრო ირანის ტერიტორიაზე ამერიკულ სარაკეტო იერიშთან დაკავშირებით განცხადებას ავრცელებს.

განცხადებაში რუსეთი მკაცრად გმობს 22 ივნისს აშშ-ის დარტყმებს ირანის ბირთვულ ობიექტებზე, რაც ისლამურ რესპუბლიკაზე ისრაელის თავდასხმებს მოჰყვა.

"სუვერენული სახელმწიფოს ტერიტორიის რაკეტებითა და ბომბებით შეტევა უპასუხისმგებლო გადაწყვეტილებაა, რომელიც უხეშად არღვევს საერთაშორისო სამართალს, გაეროს წესდებას და გაეროს უშიშროების საბჭოს რეზოლუციებს, რომლებიც ადრე ცალსახად აფასებდნენ ასეთ ქმედებებს მიუღებლად. განსაკუთრებით შემაშფოთებელია, რომ დარტყმები გაეროს უშიშროების საბჭოს მუდმივმა წევრმა ქვეყანამ განახორციელა," — წერია რუსეთის საგარეო საქმეთა სამინისტროს ვებგვერდზე გავრცელებულ განცხადებაში.

რუსეთის საგარეო უწყება წერს, რომ აშშ-ს ქმედების გამომწვევი შედეგები, რადიოლოგიურის ჩათვლით, ჯერ კიდევ შესაფასებელია. მათი შეფასებით, მოვლენების "სახიფათო ესკალაცია" დაწყებულია, რაც რეგიონულ და გლობალურ უსაფრთხოებას ასუსტებს. კონფლიქტის გამწვავების შანსები კი ახლო აღმოსავლეთში უფრო და უფრო იზრდება.

განცხადებაში ნათქვამია, რომ ამ თავდასხმებმა ბირთვული იარაღის გაუვრცელებლობის შესახებ ხელშეკრულებისა (NPT) და საერთაშორისო ატომური ენერგიის სააგენტოს (IAEA) მიმართ ნდობა მნიშვნელოვნად შეასუსტა ბირთვული აქტივობის შემოწმებისა და მონიტორინგისთვის.

"სააგენტოს ხელმძღვანელობისგან ველით სწრაფ პროფესიონალურ და კეთილსინდისიერ რეაქციას. სააგენტოს საგანგებო სხდომაზე, რომელიც უახლოეს მომავალშია დაგეგმილი, საჭიროა მოვისმინოთ IAEA-ს გენერალური დირექტორის ობიექტური ანგარიში.

რა თქმა უნდა, გაეროს გენერალურ მდივანს აუცილებლად უნდა ჰქონდეს რეაქცია. შეერთებული შტატებისა და ისრაელის კონფრონტაციული ქმედებები ერთობლივად უნდა იქნას უარყოფილი.

ჩვენ მოგიწოდებთ, დაასრულოთ აგრესია და გაზარდოთ მცდელობები რომ შექმნათ მდგომარეობა სიტუაციის პოლიტიკურ და დიპლომატიურ არხებზე დასაბრუნებლად," — ნათქვამია განცხადებაში.

მეტი აშშ-ს მიერ ირანის ბირთვული ობიექტების დაბომბვის შესახებ: