აზერბაიჯანელი აქტივისტი და ჟურნალისტი, რომელიც ალიევის ხელისუფლებისადმი მწვავე კრიტიკით გამოირჩეოდა, 2017 წელს თბილისადან გაიტაცეს და რამდენიმე საათში აზერბაიჯანის ციხეში აღმოჩნდა.

მუხთარლი ამტკიცებდა, რომ გატაცებაში ჩართული იყო ქართული მხარე, ხოლო გადაყვანისას არასათანადო მოპყრობის მსხვერპლიც გახდა.

აზერბაიჯანის სასამართლომ "საზღვრის უკანონოდ გადაკვეთის და ვალუტის კონტრაბანდის ბრალდებით" ჟურნალისტს 6 წლით თავისუფლების აღკვეთა მიუსაჯა. თუმცა, 2020 წელს მუხთარლი მოულოდნელად გაათავისუფლეს და სპეციალური რეისით გერმანიაში გაამგზავრეს.

აფგან მუხთარლი ოჯახით დღემდე გერმანიაში ცხოვრობს. გერმანიამ მას პოლიტიკური თავშესაფარი მისცა.

ევროსასამართლოს გადაწყვეტილებით ცნობილი ხდება, რომ გამოძიების ნაწილში საქართველომ ევროპული კონვენციის მე-3 მუხლი (წამების აკრძალვა) და მე-5 მუხლი (თავისუფლებისა და პირადი ხელშეუხებლობის უფლება) დაარღვია, განმცხადებლის გატაცების, არასათანადო მოპყრობის შესახებ ეფექტური გამოძიების ჩატარებით და უკანონო ტრანსპორტირებით აზერბაიჯანში. თუმცა, სასამართლომ არ დაადგინა მე-3 და მე-5 მუხლების დარღვევა არასათანადო მოპყრობისა და პატიმრობის ნაწილში.

სასამართლომ ასევე დაადგინა აზერბაიჯანის მიერ კონვენციის მე-5 მუხლის მე-3 პუნქტის დარღვევა (თავისუფლებისა და პიროვნების უსაფრთხოების უფლება), რომლის მიხედვითაც დაკავებული პირი დაუყოვნებლივ უნდა წარდგეს მოსამართლის, ან კანონით მინიჭებული სასამართლო უფლებამოსილების მქონე სხვა თანამდებობის პირის წინაშე;
აზერბაიჯანს დაუდგინდა მე-8 მუხლის დარღვევაც, რაც პირადი და ოჯახური ცხოვრების პატივისცემის უფლებას გულისხმობს.

სასამართლომ საქართველოს მუხთარლის სასარგებლოდ მორალური ზიანის ანაზღაურება — 10 000 ევროს, ასევე ხარჯების, 2500 ევროს, ხოლო აზერბაიჯანს მორალური ზიანის სახით 6 000 ევროს და ხარჯების 2500 ევროს გადახდა დააკისრა.

აფგან მუხთარლის ადვოკატის არჩილ ჩოფიკაშვილის თქმით, სახელმწიფოს უნდა ჰქონდეს რეაგირება — რამ გამოიწვია ეს შედეგები და უნდა დადგეს კონკრეტული პირების პასუხისმგებლობის საკითხი.

მუხთარლიმ წარსულში არაერთხელ განაცხადა, რომ საქართველოდან მისი გატაცება და აზერბაიჯანში გადაყვანა, ქართული ოცნების დამფუძნებლის, ბიძინა ივანიშვილის დავალებით მოხდა.