სოციალური მედია პლატფორმა Telegram-ის დამფუძნებელი, 39 წლის პაველ დუროვი 25 აგვისტოს, პარიზის აეროპორტში დააპატიმრეს. BBC-ის ინფორმაციით, დუროვი მას შემდეგ დააკავეს, რაც მისი კერძო თვითმფრინავი ლე ბურჟეს აეროპორტში დაეშვა.

25 აგვისტოს, საფრანგეთის სასამართლომ Telegram-ის დამფუძნებელს, პაველ დუროვს პატიმრობა კიდევ 48 საათით გაუხანგრძლივა. ამის შესახებ AFP იუწყება.

პაველ დუროვი რუსეთში დაიბადა და დუბაიში ცხოვრობს. მას არაბთა გაერთიანებული საამიროებისა და საფრანგეთის ორმაგი მოქალაქეობა აქვს. მას ბრალი ედება ნარკოტიკების რეალიზაციაში, პედოფილიასთან დაკავშირებული მასალის გავრცელებასა და თაღლითობაში.

Telegram სოციალური ქსელია, რომელიც ერთ-ერთ ყველაზე დაცულ მიმოწერის საშუალებად ითლება მსოფლიოში. თუმცა, დუროვის დაკავების შემდეგ რუსმა მაღალჩინოსნებმა Telegram-ში სამსახურეობრივი მიმოწერის წაშლის განკარგულება მიიღეს.

ამ განცხადებას კრემლის პროპაგანდისტი მარგარიტა სიმონიანიც გამოეხმაურა.

"რა არის მთავარი დუროვის ისტორიაში? ისინი, ვინც მიეჩვია Telegram-ში მგრძნობიარე საუბრებს/მიმოწერას, ახლავე უნდა წაშალონ და მეორედ ასე აღარ მოიქცნენ. ის (დუროვი) დაიჭირეს, რომ გამოართვან “გასაღები“, რომლის მიცემაც აუცილებლად მოუწევს", — წერს სიმონიანი.

კრემლის პროპაგანდისტებს შორის კომენტარი რუსეთის ყოფილმა პრეზიდენტმა, უშიშროების საბჭოს მოადგილემ — დმიტრი მედვედევმაც გააკეთა.

"ოდესღაც, დიდი ხნის წინ, დუროვს ვკითხე, რატომ არ უნდა სამართალდამცავებთან თანამშრომლობა. "ეს ჩემი პრინციპული პოზიციაა", — მითხრა მან. "მაშინ ყველა ქვეყანაში გექნება სერიოზული პრობლემები", — ვუპასუხე მე. ჩათვალა, რომ ყველაზე დიდი პრობლემები რუსეთში შეექმნებოდა და გაიქცა. უნდოდა "მსოფლიოს მოქალაქე" ყოფილიყო, რომელიც სამშობლოს გარეშე ცხოვრობს. შეცდომა დაუშვა. უნდა მიხვდეს, რომ სამშობლოს, ისევე, როგორც დროებას, არ ირჩევენ", — წერს მედვედევი.

რუსეთის ფედერაციის ომბუდსმენის, ტატიანა მოსკალკოვას თქმით, დუროვის დაკავების რეალური მიზეზი Telegram-ის დახურვის მცდელობაა.

"სრულიად ნათელია, რომ პაველ დუროვის დაკავების რეალური მიზეზი Telegram-ის დახურვის მცდელობაა, ინტერნეტ პლატფორმისა, რომელზეც მსოფლიოში მიმდინარე მოვლენების შესახებ სიმართლის გაგებაა შესაძლებელი", — წერს მოსკალკოვა.

დუროვმა 2014 წელს დატოვა რუსეთი. მისი თქმით, წასვლის მიზეზი რუსეთის სპეცსამსახურის ზეწოლა გახდა, რომლებიც მას ევრომაიდნის მონაწილე უკრაინელი აქტივისტების პირადი მონაცემების მიღებას სთხოვდნენ. Telegram-ის აპლიკაცია რუსეთში 2018 წელს აიკრძალა, მას შემდეგ რაც დუროვმა უარი განაცხადა მომხმარებლის მონაცემების გადაცემაზე. აკრძალვა 2021 წელს გაუქმდა. თვითონ Telegram 2013 წელს გაჩნდა ბაზარზე. ის დუროვმა ძმასთან ერთად შექმნა.