2024 წლის 14 მაისს, საქართველოს პარლამენტმა "რუსული კანონი" მესამე მოსმენით მიიღო. კანონის მხარდამჭერ პარლამენტართა თანახმად, აღნიშნული კანონის დამტკიცება გამჭვირვალობის უზრუნველყოფას ემსახურება.

მაშინ, როდესაც ხელისუფლება მედიასაშუალებებს, სამოქალაქო საზოგადოების ორგანიზაციებსა და ფონდებს გაუმჭვირვალობაში ადანაშაულებს, კონკრეტულ სახელმწიფო სტრუქტურებში საჯარო ინფორმაციაზე ხელმისაწვდომობა უარესდება.

ინფორმაციის თავისუფლების განვითარების ინსტიტუტმა (IDFI) გასული ათწლეულის განმავლობაში (2010-2022 წ) მიმართა 200-ზე მეტ სახელმწიფო დაწესებულებას, საჯარო ინფორმაციის გამოთხოვის მიზნით და წარმოადგინა დაწესებულებებიდან მიღებული უკუკავშირის სტატისტიკა. IDFI-ს ანგარიშის თანახმად, ქართული ოცნების მმართველობის პერიოდში საჯარო ინფორმაციაზე ხელმისაწვდომობა ყველაზე მაღალი 2013 წელს (90%), ხოლო ყველაზე დაბალი 2022 წელს (58%) იყო.

ინფოგრაფიკაში წარმოდგენილია 2019 და 2022 წლებში კონკრეტული სახელმწიფო დაწესებულებების მიერ საჯარო ინფორმაციის გაცემის დინამიკა. სტატისტიკა ადასტურებს, რომ ბოლო სამი წლის ჭრილში, კონკრეტული სახელმწიფო დაწესებულებების მიერ საჯარო ინფორმაციის გაზიარების პრაქტიკა უარესდება.

ამასთანავე, საქართველოს ღია მმართველობის პარტნიორობის (OGP) ფარგლებში აღებული აქვს საჯარო ინფორმაციის თვითორგანიზებულად (პროაქტიულად) გამოქვეყნების ვალდებულება. IDFI-ს 2022 წლის მონაცემების თანახმად, კონკრეტული უწყებების მიერ საჯარო ინფორმაციის მნიშვნელოვანი წილი არ ქვეყნდებოდა. აღსანიშნავია, რომ საჯარო ინფორმაციაზე თავისუფალი წვდომა ევროკავშირთან ინტეგრაციის ერთ-ერთ წინაპირობაა.