პრესის თავისუფლების მსოფლიო ინდექსში საქართველოს მდგომარეობა 26 პოზიციით გაუარესდა — 180 ქვეყანას შორის 103-ე ადგილი დავიკავეთ. ანგარიში საერთაშორისო ორგანიზაცია რეპორტიორები საზღვრებს გარეშემ (RSF) 2024 წლის 3 მაისს გამოაქვეყნა და ის გასული წლის მოვლენებს ასახავს. მათ შორის, რუსული კანონის პირველად დაინიციირებას.

RSF წერს, რომ:

  • 2023 წელს ხელისუფლება ცდილობდა მიეღო კანონები, რომლებიც მედიის მარგინალიზაციასა და სიტყვის თავისუფლების შეზღუდვას ისახავდა მიზნად (საუბარია რუსულ კანონზე, რომელიც ხელისუფლებამ საზოგადოების პროტესტის ფონზე, 2023 წელს უკან გაიწვია, ხოლო 2024 წელს კი ხელახლა დააბრუნა და მიიღო კიდეც). ორგანიზაციის თქმით, ამგვარი ჩარევა ხელისუფლების მხრიდან ძირს უთხრის საქართველოში პრესის თავისუფლებას;
  • დამოუკიდებელი მედიისთვის გარემო რჩება მტრული, გაზრდილია ჟურნალისტებზე ფიზიკური და სიტყვიერი თავდასხმების რაოდენობა. მათ შორის, ხელისუფლების მაღალი რანგის წარმომადგენლების მხრიდან;
  • საქართველოში მედიაგარემო მრავალფეროვანი, თუმცა უკიდურესად პოლარიზებულია. ქვეყანა სერიოზულ პოლიტიკურ კრიზისშია;
  • სიძულვილის ენა და დეზინფორმაცია ფართოდაა გავრცელებული მედიაში (განსაკუთრებით ტელევიზიაში);
  • ორგანიზაციის თქმით, 2021 წლის ივლისში ჰომოფობიური კონტრდემონსტრაციების დროს 50-მდე ჟურნალისტზე სასტიკი თავდასხმა უპრეცედენტო უკუსვლა იყო. საქმე გამოუძიებელია, ჟურნალისტებზე თავდამსხმელები კი კვლავ არ დასჯილან;
  • ხელისუფლებას არ შეუსრულებია ევროკავშირის რეკომენდაცია პრესის თავისუფლების შესახებ, რაც აუცილებელი ნაბიჯია მოლაპარაკებების ეტაპზე გადასასვლელად.