რა ხდება: მითების დეტექტორი წერს, რომ იმ მუქარისა და შევიწროების მძიმე კამპანიის ფონზე, რასაც ქართული ფაქტების გადამოწმების ორგანიზაციები განიცდიან, ფაქტების გადამოწმების ევროპული სტანდარტების ქსელმა (EFCSN) და ფაქტების გადამოწმების საერთაშორისო ქსელმა (IFCN) ღია წერილი გაუგზავნეს ევროკავშირის ხელმძღვანელობას.

წერილის ადრესატები არიან:

• ურსულა ფონ დერ ლაიენი — ევროკომისიის პრეზიდენტი,
• ჯოზეფ ბორელ ფონტელესი — ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში და
• ვერა იუროვა — ევროკომისიის ვიცე-პრეზიდენტი ღირებულებებისა და გამჭვირვალობის საკითხებში.

დეტალები: წერილის ავტორები წერენ, რომ ფაქტების გადამოწმების ორგანიზაციების ოფისებზე თავდასხმას ხელს უწყობენ ქართული ოცნების მაღალჩინოსნები, რომლებიც მათ კოლეგებს "უსამშობლო აგენტებად და ნეოფაშისტებად" მოიხსენიებენ.

• ავტორები მიუთითებენ, რომ თავდასხმების კამპანია მიმდინარეობს რუსული კანონის ფონზე, რომლის გაუქმების შესახებ რეკომენდაცია ვენეციის კომისიამაც გასცა.
• "ქართული სამოქალაქო საზოგადოებისა და მედია ორგანიზაციების, მათ შორის ჩვენი კოლეგების შევიწროება დამოუკიდებელი ჟურნალისტიკის ჩახშობის კიდევ ერთი მცდელობაა, ვინაიდან ორგანიზაციების დევნა ხდება მხოლოდ იმიტომ, რომ ისინი ცდილობენ, განაგრძონ საკუთარი პროფესიული მოვალეობის შესრულება", — ვკითხულობთ წერილში.

წერილის ავტორები ევროკავშირის ხელმძღვანელობას მოუწოდებენ, რომ ვინაიდან დაშინების კამპანია მიმდინარეობს ქვეყანაში, რომელიც ევროკავშირის წევრობის ოფიციალური კანდიდატია, მათ უნდა უზრუნველყონ, რომ საქართველოს ხელისუფლებამ შეწყვიტოს ფაქტების გადამმოწმებლების შევიწროება:

• EFCSN და IFCN აღნიშნავენ, რომ მითების დეტექტორი და ფაქტ-მეტრი მათი საზოგადოების წევრები არიან და მათი დამოუკიდებლობის, გამჭვირვალეობისა და მეთოდოლოგიური სტანდარტების შეფასება ყოველწლიურად დამოუკიდებელი ექსპერტების მიერ ხდება:
• "ისინი აღნიშნული კამპანიის სამიზნე იმიტომ გახდნენ, რომ მათი საქმიანობა სწორედ ამ ღირებულებებს ეფუძნება; გთხოვთ, გამოიყენოთ თქვენს ხელთ არსებული ინსტრუმენტები, რათა უზრუნველყოთ აღნიშნული თავდასხმების შეჩერება".

კონტექსტი: 30 მაისს, უცნობმა პირებმა, არასამთავრობო ორგანიზაციების და ოპოზიციური პარტიების ოფისის კედლებზე, მუქარის შემცველი წარწერები დატოვეს.

• მოგვიანებით, ქართული ოცნების დეპუტატმა, დიმიტრი სამხარაძემ ფეისბუქზე დაწერა, რომ "აგენტების წამოწყებულ ბულინგს პასუხი გაეცა" და გამოაქვეყნა ვიდეო, სადაც ჩანს, როგორ ესვრიან კვერცხებს იმ შენობებს, სადაც ბრიტანეთის საკონსულოს სავიზო ცენტრი, ტვ BMG, პარტია ახალი და სხვა საერთაშორისო კომპანიების ოფისებია.

ამ თემაზე: დეპუტატი დიტო სამხარაძე აღიარებს, რომ შეურაცხმყოფელი წარწერების ორგანიზატორი თავად არის