გუშინ, ღია Facebook Live ინტერვიუს დროს, მარკ ცუკერბერგმა ერთ-ერთი მომხმარებლის შეკითხვას უპასუხა, რომელიც ხელოვნურ ინტელექტს, კერძოდ კი, მასთან დაკავშირებულ საფრთხეებს უკავშირდებოდა.

როგორც იცით, რამდენიმე მეცნიერი და ბიზნესმენი, მათ შორის, ილონ მასკი, ხელოვნურ ინტელექტს ჩვენი ცივილიზაციის ერთ-ერთ ყველაზე დიდ გამოწვევად და საფრთხედ მიიჩნევს. Facebook-ის დამფუძნებელსა და დირექტორს კი, ამაზე განსხვავებული აზრი აქვს და თვლის, რომ სურათი ბევრად ოპტიმისტურია, ხოლო ის ადამიანები, რომლებიც AI-ს დემონიზაციას ცდილობენ, უპასუხისმგებლოები არიან:

"არ მესმის იმ ადამიანების, რომლებიც ცდილობენ აპოკალიპტიკური სურათი დაგვიხატონ. ეს ძალიან ნეგატიური მოვლენაა და ვფიქრობ, უპასუხისმგებლოც კი."

"მომავალ ხუთ წელიწადში ხელოვნური ინტელექტი უამრავ ახალ შესაძლებლობას მოგვცემს. თუ ხელოვნური ინტელექტის წინააღმდეგ გამოდიხარ, ე.ი. ეწინააღმდეგები უსაფრთხო მანქანებს, რომლებიც ავარიებში არ მოხვდებიან, ეწინააღმდეგები ადამიანებისთვის დიაგნოზის უკეთ და დროულად დასმას", განაცხადა ცუკერბერგმა.

აღნიშნულ განცხადებას ტვიტერზე გამოეხმაურა ილონ მასკი.

"მე და მარკს გვისაუბრია ამ თემაზე. მას ამ თემაზე შეზღუდული წარმოდგენები აქვს", წერს ის.

მომდევნო ტვიტში, მასკმა აღნიშნა, რომ AI-ს განვითარება, როგორც პროგრამული მხარის, ასევე მოწყობილობების, გაორმაგებულია და განვითარების ეს ტემპები განაპირობებს საფრთხეებს.

რამდენად მართალია ცუკერბერგი ან მასკი, ამას, ცხადია, მომავალი გვიჩვენებს, თუმცა ისიც უნდა აღნიშნოს, რომ ხელოვნური ინტელექტი მართლაც სწრაფად ვითარდება და ის კი არა, გუგლის შექმნილმა AI-მ მეორე ხელოვნურ ინტელექტთან საურთიერთოდ ახალი ენა მოიგონა, რომელიც ადამიანებს არ გვესმის და კაცმა არ იცის რას ლაპარაკობს ერთმანეთში ეს ორი ბოტი.