მოკლედ: რუსული მედიასაშუალების, აგენტსტვოს ინფორმაციით, დღეს, ორშაბათს, 22 აპრილს, თბილისში კონფერენცია სახელწოდებით "რუსეთი და მსოფლიო: დიალოგები – 2024. მიზიდულობის ძალები" იმართება.

  • მედიასაშუალების ცნობით, ღონისძიების ერთ-ერთი ორგანიზატორია კომუნიკაციების განვითარების ეროვნული კვლევითი ინსტიტუტი, რომელიც შეიქმნა რუსეთის სახელმწიფო უშიშროების კომიტეტის (კგბ), რუსეთის ფედერაციის საგარეო დაზვერვის სამსახურისა და უშიშროების ფედერალური სამსახურის (ეფ-ეს-ბე) წარმომადგენლების მიერ.

დეტალები: რუსეთის კომუნიკაციების განვითარების ეროვნული კვლევითი ინსტიტუტის ვებგვერდზე განთავსებულ განცხადებაში ნათქვამია, რომ ექსპერტები რუსეთიდან და საქართველოდან მსჯელობენ თემაზე "ტრადიციული ღირებულებები, როგორც ქვეყნებისა და ხალხების დაახლოების ფაქტორი".

  • აგენტსტვოს ცნობით, კონფერენციაზე სიტყვით გამოვლენ კრასნოდარის სამეცნიერო კვლევითი ინსტიტუტის დირექტორის მოადგილე ვალენტინა კომლევა, პოლიტიკური სტრატეგი ევგენი მინჩენკო, რუსეთის მეცნიერებათა აკადემიის აღმოსავლეთმცოდნეობის ინსტიტუტის წამყვანი მკვლევარი ალექსანდრე იაკოვლევი და მსოფლიო სამხედრო ეკონომიკის და სტრატეგიის წამყვანი ექსპერტი ევგენია გორიუშინა.

კონფერენციის ორგანიზატორები არიან ორი ქართული ორგანიზაცია — ევრაზიის ინსტიტუტი და ფონდი SIKHA, მათთან ერთად რუსული — კომუნიკაციების განვითარების ეროვნული კვლევითი ინსტიტუტი.

კონფერენციის მისამართი არ სახელდება. კომლევამ აგენტსტვოს დაუდასტურა, რომ კონფერენცია ორშაბათს თბილისში მართლაც გაიმართებოდა, თუმცა დეტალებზე არ უსაუბრია.

რა ვიცით კომუნიკაციების განვითარების ეროვნულ კვლევით ინსტიტუტზე: აგენტსტვოს ინფორმაციით, ეს ორგანიზაცია რუსეთში 2020 წლიდან არსებობს.

მის თანადამფუძნებლებს შორის იყო გენერალ-ლეიტენანტი ნიკოლაი გრიბინი და საგარეო დაზვერვის აკადემიის ყოფილი ხელმძღვანელი.

მეორე თანადამფუძნებელი არის მეწარმე ირინა ზავესნიცკაია, რომელიც, გავრცელებული ინფორმაციით, რეგისტრირებულია იმავე მისამართზე, სადაც ინსტიტუტის დირექტორი ვლადისლავ გასუმიანოვი.

  • გასუმიანოვის ოფიციალური ბიოგრაფიის თანახმად, იგი მსახურობდა კგბ-ში, საგარეო დაზვერვასა და ეფ-ეს-ბეში, 1982 წლიდან 2001 წლამდე.
  • ინსტიტუტის სამეთვალყურეო საბჭოში შედიან საბჭოთა და რუსეთის სადაზვერვო სამსახურების სხვა ყოფილი თანამშრომლები.

თბილისის გარდა, კონფერენცია გაიმართება მინსკში, დუშანბეში, ცხინვალსა და ბიშკეკში. მთავარი სხდომა კი 23 მაისს, მოსკოვშია დაგეგმილი.

  • გასულ წლებში ანალოგიურ კონფერენციებში მონაწილეობდნენ კრემლისა და რუსეთის საგარეო საქმეთა სამინისტროს წარმომადგენლები.

ინფორმაცია ორგანიზატორებზე: აგენტსტვო წერს, რომ ევრაზიის ინსტიტუტი და ფონდი SIKHA პოზიციონირებენ როგორც კვლევით ინსტიტუტები.

  • ფონდ SIKHA-ს დამფუძნებელი არჩილ სიხარულიძე ეწინააღმდეგება საქართველოს ევროკავშირში გაწევრიანებას და მხარს უჭერს ვლადიმირ პუტინის ინიციატივებს.
  • ევრაზიის ინსტიტუტის ხელმძღვანელი გულბაათ რცხილაძე დახმარებას უგზავნის რუს სამხედროებს უკრაინის ფრონტზე და ემხრობა რუსეთთან ეკონომიკურ თანამშრომლობას.

აგენტსტვომ მათთან დაკავშირება ვერ შეძლო.

ფონდ თავისუფალი რუსეთის დირექტორმა სამხრეთ კავკასიაში, ეგორ კუროპტევმა აგენტსტვოს განუცხადა, რომ არ ახსოვს შემთხვევები, როდესაც რუსული სტრუქტურები, ბოლო წლებში, საქართველოში მსგავსი კონფერენციების ორგანიზატორები ყოფილიყვნენ.

ბოლო ხაზი: კონფერენცია, რომელზეც "ტრადიციული ღირებულებების" შესახებ მსჯელობენ, იმართება იმ ფონზე, როდესაც საქართველოში რუსულ კანონებს განიხილავენ.

  • ეს არის კანონი უცხოური გავლენების შესახებ და ლგბტქ+ ადამიანების წინააღმდეგ მიმართული საკონსტიტუციო ცვლილებები.