რა ხდება: ორშაბათს, 15 აპრილს, თბილისში, რუსული კანონის საწინააღმდეგო 2 აქცია გაიმართება.

• პირველი აქცია, სახელწოდებით — არა რუსულ კანონს!, პარლამენტის უკანა შესასვლელთან დილის 10 საათზე დაიწყება, კანონპროექტის საკანონმდებლო მოსმენის პარალელურად.
• მეორე საპროტესტო აქცია კი საღამოს, 19:00 საათზე, რუსთაველის გამზირზე, პარლამენტის შენობის წინ გაიმართება.

ხელოვანები 15 აპრილის პროტესტზე: რა მიზეზების გამო არის ხვალინდელი პროტესტი თქვენთვის მნიშვნელოვანი? — ჰკითხა On.ge-მ დღეს დედაენის ბარში მისულ ხელოვანებს, რომლებიც საქართველოს ევროპული ორბიტის მიერ ორგანიზებულ ღონისძიებას დაესწრნენ, სახელწოდებით — კულტურის ხმა: კი ევროპას, არა რუსულ კანონს!

• ორგანიზატორებმა ეს ღონისძიება 14 აპრილს, ქართული ენის დღეს დაგეგმეს, რადგან "სწორედ ქართული ენა და კულტურაა ის, რისი შევიწროებითაც, მთელი ისტორიის განმავლობაში რუსული იმპერია ჩვენი ეროვნული იდენტობის წაშლას ცდილობდა", — აცხადებენ ისინი.

ქართული ენის დღის მნიშვნელობაზე ისაუბრა On.ge-სთან მომღერალმა თამარ ჭოხონელიძემაც. "პირველ რიგში, დღეს ისეთი დღეა, რომ მადლობა უნდა ვუთხრა იმ ახალგაზრდებს, განსაკუთრებით, იმ სტუდენტებს, მართლაც წამყვან ძალას, რომელმაც ფაქტობრივად, ჩვენი ბედი გადაწყვიტა 1978 წელს", — გვითხრა მან.

1978 წლის მოვლენებისას, საქართველომ სახალხო პროტესტით შეძლო, შენარჩუნებოდა ქართულ ენას სახელმწიფო ენის სტატუსი. რუსთაველის გამზირზე ათასობით ადამიანი აღუდგა წინ საბჭოთა კავშირის ხელმძღვანელების სურვილს, საბჭოთა კონსტიტუციის 78-ე მუხლში შეტანილიყო ცვლილება, რომლის მიხედვით, ქართული ენა სახელმწიფო ენის სტატუსს კარგავდა.

თამარ ჭოხონელიძე ამბობს, რომ იმ დროისათვის სკოლაში სწავლობდა, მაგრამ ახსოვს სიამაყის განცდა: "ფაქტობრივად, თავი დადეს და დღეს რომ ჩვენ ქართულად ვმეტყველებთ და ვაზროვნებთ, მათი დამსახურებაა. ამიტომაც ქედს ვიხრი მათ წინაშე", — თქვა მან და ხვალინდელი პროტესტის მნიშვნელობაზეც ისაუბრა. "ხვალ, 15 აპრილს, აქციაზე უნდა გავიდეთ ყველა, იმიტომ, რომ ჩვენი ბედი წყდება. იცოდეთ, ჩვენი ერთიანობა მთავარ სათქმელს ეტყვის რუსეთს — მთავარ მტერს. უნდა დაინახოს, რომ ჩვენ ერთად ყოფნა და ერთად ბრძოლა შეგვიძლია."

დედაენის ბარში რუსული კანონის ირგვლივ ისაუბრეს არა მარტო ხელოვანებმა, რამდენიმე არასამთავრობო ორგანიზაციის წარმომადგენელმაც.

იურისტმა გიორგი მშვენიერაძემ (ორგანიზაცია "დემოკრატიის მცველები"), სხვა საკითხებთან ერთად, ისაუბრა იმის შესახებაც, თუ როგორ აისახება კანონი არასამთავრობო ორგანიზაციების საქმიანობაზე და მთლიანობაში, ქართულ საზოგადოებაზე.

რეჟისორ ლანა ღოღობერიძეს რუსული კანონის შინაარსი 1937 წლის მოვლენებს ახსენებს, რადგან ქართული ოცნების მიერ ხელახლა ინიციირებული კანონპროექტი "დასმენის" კომპონენტსაც მოიცავს.

ხელოვანებმა ასევე გამოთქვეს სურვილი, მეტად მოხდეს იმ ადამიანების სწორი ინფორმირება, ვისაც, სახელისუფლებო პროპაგანდის გავლენის გამო, ჯერ არ გაუაზრებია იმ საფრთხეების შესახებ, რასაც ხელისუფლების მიერ მხარდაჭერილი რუსული კანონი ქართულ საზოგადოებას უქმნის.