რა ხდება: დღეს, 23 თებერვალს, იუნკერთა ხსოვნის დღეა. 103 წელი გავიდა მას შემდეგ, რაც ისინი საქართველოს დამოუკიდებლობისთვის ბრძოლაში საბჭოთა არმიას ემსხვერპლნენ.

  • საქართველოს პრემიერ-მინისტრი ირაკლი კობახიძე, 1921 წლის თებერვალში, კოჯორ-ტაბახმელასთან დაღუპულ იუნკერთა ხსოვნისადმი მიძღვნილ ღონისძიებას დაესწრო. ის იქ მივიდა პარლამენტის თავმჯდომარესთან, შალვა პაპუაშვილთან და თბილისის მერთან, კახა კალაძესთან ერთად და იუნკერთა მემორიალი გვირგვინით შეამკო.

On.ge-ს არქივიდან: გაიცანით ქართველი იუნკრები, რომლებმაც დამოუკიდებლობისთვის ბრძოლას შესწირეს თავი


მოკლედ — რა უნდა გვახსოვდეს იუნკერთა შესახებ: 1921 წლის 11 თებერვალს საბჭოთა წითელი არმია საქართველოს დემოკრატიულ რესპუბლიკას თავს დაესხა.

  • 17 თებერვალს, დილის 5 საათზე, გენერალმა გიორგი კვინიტაძემ ბრძანება გასცა, საბრძოლო პოზიციები სხვა სამხედრო ნაწილებთან ერთად, საქართველოს იუნკერთა სკოლის მსმენელებსაც დაეკავებინათ.
  • მათ თბილისის მისადგომების დაცვა დაევალათ და 7 კილომეტრის საბრძოლო პოზიცია დაიკავეს კოჯორ-ტაბახმელასთან.
  • იუნკერთა პოზიციებზე პირველი მასირებული შეტევა 19 თებერვალს დაიწყო.
  • ბოლშევიკების იერიშების მიუხედავად, იუნკრებმა პოზიციების შენარჩუნება შეძლეს.
  • საქართველოს შეიარაღებული ძალები, გენერალ კვინიტაძის სარდლობით თბილისს 1 კვირის განმავლობაში იცავდა.

მე-11 არმიამ შეტევა გააძლიერა და ტაბახმელისკენ მიმართა წითელ კურსანტთა ბრიგადა, რომელიც ყველაზე აგრესიული მებრძოლებისგან შედგებოდა. ბრძოლაში დამატებითი ძალების ჩართვის მიუხედავად, რუსებმა ტაბახმელა ვერ აიღეს, მაგრამ შეავიწროვეს ქართული ნაწილები.

1921 წლის 17-24 თებერვალს, იალღუჯასთან, კოჯორთან და ტაბახმელასთან, საქართველოს თავისუფლებისთვის ბრძოლაში ათეულობით იუნკერი დაიჭრა და დაიღუპა. იუნკრებთან ერთად დაიღუპა მოხალისე მოწყალების და მარო მაყაშვილი. ის საარტილერიო დაბომბვას შეეწირა.