რა ხდება: ტელეგრამის არხის, Сапа Цхинвал-ის მიხედვით, რუსეთის მიერ ოკუპირებული ცხინვალის ე.წ. სახელმწიფო რადიოსადგურმა IR შეწყვიტა კრემლის მიერ "უცხოური გავლენის აგენტებად" გამოცხადებული მომღერლების სიმღერების ეთერში გაშვება.

დეტალები: რადიოს ეთერში აღარ ისმის ზემფირას სიმღერები, ასევე, ჯგუფების — Bi-2 და Машина времени-ს რეპერტუარი.

  • ტელეგრამის არხის ინფორმაციით, გადაწყვეტილება, ე.წ. სახელმწიფო ტელერადიომაუწყებლობის კომპანიის ხელმძღვანელების მოთხოვნით, დაახლოებით ერთი კვირის წინ მიიღეს.
  • "ერთმა მათგანმა მუსიკალურ რედაქტორთან საუბრისას თქვა, რომ "არ სურს მოღალატეების მოსმენა", რადგან თავადაც რუსეთის მოქალაქეა და მოითხოვა, რუსეთის ფედერაციაში "უცხოელ აგენტებად" გამოცხადებული შემსრულებლების სიმღერები ჩვენი ეთერიდან ამოგვეღო", — უთხრა წყარომ Сапа Цхинвал-ს.
  • მათივე ინფორმაციით, რადიოს მენეჯმენტი იმაზეც დიდხანს ფიქრობდა, ამოეღოთ თუ არა ეთერიდან ალა პუგაჩოვას რეპერტუარი, რომელიც მართალია, რუსეთში "უცხოურ აგენტად" არ გამოუცხადებიათ, მაგრამ რუსეთის მიერ უკრაინაში წარმოებული სრულმასშტაბიანი ომის თაობაზე მისი ზოგი საჯარო პოზიციის გამო, მასაც მიაწებეს "მოღალატის იარლიყი".

რას ამბობენ რადიოში: IR-ის დირექტორმა, ხათუნა კაზიევამ განაცხადა, რომ ისინი იღებდნენ ზარებს, ამ შემსრულებლების ფლეილისტიდან ამოღების მოთხოვნით და ტელეგრამ-არხს უთხრა, რომ გაუჭირდება იმის თქმა, კვლავ დააბრუნებენ თუ არა აკრძალულ მომღერლებს რადიოს მუსიკალურ ბადეში, რადგან "გადაწყვეტილება ჯერ დროებითია".

ბოლო ხაზი: რუსული კანონპროექტი, უცხოური აგენტების შესახებ, ინიციირებულია ოკუპირებული აფხაზეთის ე.წ. პარლამენტში, თვითგამოცხადებული პრეზიდენტის, ასლან ბჟანიას მიერ.

  • ანალოგიური რუსული კანონის მიღება საქართველოში უნდოდა მმართველ პარტიას, ქართულ ოცნებას 2023 წლის მარტში.
  • ამას თბილისში მასობრივი პროტესტი მოჰყვა.
  • საქართველოს ხელისუფლებამ ჯერ ორჯერ, ძალის გამოყენებით დაარბია აქციის მონაწილეები, შემდეგ კი საზოგადოებრივი ზეწოლის იძულებით, კანონპროექტი პარლამენტიდან გაიწვია.