რა ხდება: როგორც პრემიერ-მინისტრმა, ირაკლი კობახიძემ მთავრობის სხდომაზე თქვა, დაახლოებით, 400 საცხოვრებელი სახლი დაიტბორა სოფელ ნერგეეთში სტიქიისას.

  • 300-ზე მეტის შემთხვევაში, დასრულდა ამოტუმბვის სამუშაოები და საბოლოო დასკვნის მომზადებამდე, უსაფრთხო ადგილზე გადაყვანილია 296 ოჯახი.
  • შეფასდა სტიქიის შედეგად მიყენებული ზარალი, მზადდება სათანადო დოკუმენტაცია, იმისათვის, რომ გაიცეს კომპენსაციები შესაბამის ოჯახებზე.

"გასული კვირა იყო ძალიან მტკივნეული ჩვენთვის. სტიქიამ, ასევე უბედურმა შემთხვევამ იმსხვერპლა 14 ადამიანის სიცოცხლე. კიდევ ერთხელ გამოვთქვამ სამძიმარს დაღუპულთა ოჯახის წევრებისა და ახლობლების მიმართ", — თქვა მან.

დეტალები: კობახიძემ აღნიშნა, რომ ადგილზე გაეცნო სტიქიის სალიკვიდაციო სამუშაოებს. ცნობისთვის, ახალი პრემიერ-მინისტრი სტიქიის ზონაში, მომხდარიდან მხოლოდ მეოთხე დღეს ჩავიდა.

მისი თქმით, "ძალიან ბევრი რამ გააკეთეს და ძალიან სწრაფად იმოქმედეს" როგორც ადგილობრივი, ასევე ხელისუფლების წარმომადგენლებმა, ასევე, სახელმწიფო უწყებებმა:

  • "ძალიან მალე აღდგა ელექტროენერგიისა და ბუნებრივი აირის მიწოდება ასეულობით სოფლისთვის, სადაც იყო პრობლემა სტიქიის გამო", — ამბობს პრემერ-მინისტრი და აღნიშნავს, რომ სწრაფად გაიწმინდა საავტომობილო გზები და აღდგა საავტომობილო მოძრაობა, შესაბამის მონაკვეთებზე.

პრობლემაა, რომ ირაკლი კობახიძემ მხოლოდ სტიქიის შემდეგ მიღებულ ზომებზე ისაუბრა და არაფერი უთქვამს იმის თაობაზე, შეეძლოთ თუ არა შესაბამის სახელმწიფო უწყებებს, პრევენციულად მიეღოთ ზომები სტიქიურად საშიშ ზონაში, მსხვერპლისა და ზარალის ასარიდებლად.

რა უნდა ვიცოდეთ: არსებობს გარემოს ეროვნული სააგენტოს გეოლოგიის დეპარტამენტის ბიულეტენი, რომელშიც წერია, რომ ბაღდათის მუნიციპალიტეტის სოფლებში, მეწყრული პროცესების გააქტიურება პროგნოზირებული იყო.

ფოტო: გარემოს ეროვნული სააგენტო

ბიულეტენი ასახავს 2022 წლის სტიქიური გეოლოგიური პროცესების შედეგებს და 2023 წლის პროგნოზებს. დოკუმენტში აღნიშნულია, რომ:

  • მეწყრული პროცესების გააქტიურება მოსალოდნელია სოფლებში: ობჩა, დიმი, წილეთხევი, ფერსათი, ნერგეეთი, შუბანი და ზეგანი.
  • ნერგეეთში მეწყერი მდინარე ხანისწყლის ნაპირზე მდებარე სახლების თავზე ჩამოწვა. დოკუმენტის მიხედვით, სწორედ ამ ადგილას იყო მოსალოდნელი ქვათაცვენის და ნაპირგარეცხვითი პროცესების წარმოქმნა-გააქტიურება.

ბოლო ხაზი: 7 თებერვალს, ბაღდათის მუნიციპალიტეტის სოფელ ნერგეეთში მეწყერი ჩამოწვა და ამას მსხვერპლი მოჰყვა. მაშველებმა, სტიქიის ზონაში, 9 ადამიანის ცხედარი იპოვეს.