გასული წლის მიწურულს, 18 დეკემბერს, რომის პაპმა ისტორიული გადაწყვეტილება მიიღო — მან მღვდელმსახურებს ოფიციალურად დართო ნება, დაელოცათ ერთი და იმავე სქესის წყვილები. ამბავს დიდი და არაერთგვაროვანი გამოხმაურება მოჰყვა; კათოლიკეების ნაწილმა, განსაკუთრებით კონსერვატიულ საზოგადოებებში, გადაწყვეტილება უარყოფითად შეაფასა. მაგალითად, აფრიკაში ეპისკოპოსებმა განაცხადეს, რომ ისინი გეი წყვილების კურთხევაზე მაინც უარს იტყოდნენ.

კრიტიკას ცოტა ხნის წინ თავად პაპი ფრანცისკეც გამოეხმაურა. იტალიურ ჟურნალ Credere-სთან ინტერვიუში, მან "ფარისევლობა" უწოდა გადაწყვეტილებას მოყოლილ უარყოფით გამოხმაურებას.

"არავინ აღშფოთდებოდა, ის ბიზნესმენი რომ დამელოცა, რომელიც ალბათ ხალხის ექსპლუატაციას ეწევა. ეს კი საშინელი ცოდვაა", — აღნიშნავს პაპი ფრანცისკე, — "სამაგიეროდ, მაშინ არიან აღშფოთებულები, როცა კურთხევას ჰომოსექსუალს ვაძლევ. ეს ფარისევლობაა. ჩვენ, ყველამ, პატივი უნდა ვცეთ ერთმანეთს. ყველას. ამ გადაწყვეტილების საფუძველიც შეწყნარებაა".

///

ამავე ინტერვიუში, რომის პაპი "იდეოლოგიზებულ ჯგუფებად" მოიხსენებს მათ, "ვინც ეკლესიის სწავლებებს შერჩევითად იყენებს და ჰომოსექსუალობას გამოყოფს". ამასთან, ვატიკანი განმარტავს, რომ გადაწყვეტილების შედეგად, ერთი და იმავე სქესის წყვილებს დალოცავენ და არა მათ "კავშირს".

"მე ერთი და იმავე სქესის წყვილების ქორწინებას არ ვაკურთხებ. მე ვაკურთხებ ორ ადამიანს, რომელთაც ერთმანეთი უყვართ და მათ ვთხოვ, ჩემთვისაც ილოცონ", — ეუბნება პაპი ინტერვიუერს, მღვდელ დონ ვინჩენცო ვიტალეს, — "აღსარების ჩაბარებისას, ჰომოსექსუალი იქნება თუ ხელმეორედ დაქორწინებული, ყოველთვის ვლოცულობ [მათთვის] და ვლოცავ. დალოცვაზე უარი არავის არ უნდა ეთქვას".

კათოლიკე ეკლესიის მეთაურმა ინტერვიუში ასევე აღნიშნა, რომ ისინი, "სასულიერო პირები, ზოგჯერ კომფორტში ცხოვრებენ" და საჭიროა, გაიგონ "ადამიანების გარჯა და ტანჯვა".

ფოტო: Franco Origlia / Getty Images

პაპ ფრანცისკეს ლგბტქ ადამიანებისთვის აქამდეც არაერთხელ დაუჭერია მხარი. 2020 წელს მან განაცხადა, რომ "ლგბტქ ბავშვები ღმერთს ისეთები უყვარს, როგორებიც არიან". ეკლესიის ლიდერმა მშობლებსაც მოუწოდა, გეი შვილებს გვერდში დაუდგნენ. მან ასევე მხარი დაუჭირა ერთი და იმავე სქესის წყვილების სამოქალაქო პარტნიორობას.

"ჰომოსექსუალ ადამიანებს ოჯახში ყოფნის უფლება აქვთ. ისინი უფლის შვილები არიან, ამდენად ისეთი სამოქალაქო კავშირის კანონის შექმნა გვჭირდება, რომელიც მათაც შეეხება. მე ამას მხარს ვუჭერ", — აღნიშნა პაპმა ფრანცისკემ.

გარდა ამისა, გასული წლის შემოდგომაზე ვატიკანმა ტრანსგენდერ ადამიანებს დართო ნება, მოინათლონ, ან თავად გახდნენ ნათლიები.