მოკლედ: გარემოს ეროვნული სააგენტო განმარტავს , როგორ განვითარდა მეწყრული პროცესები, რომელსაც დასავლეთ საქართველოში მსხვერპლი მოჰყვა.

  • ერთ-ერთი მთავარი გამომწვევი მიზეზი, მათი თქმით, დიდი რაოდენობით ნალექია.

დეტალები: სააგენტო წერს, რომ ბაღდათის მუნიციპალიტეტის სოფელ ნერგეეთის ტერიტორიაზე, 7 თებერვალს, მდინარე ხანისწყლის ხეობის მარჯვენა ფერდობზე მოხდა მეწყრული პროცესის ჩასახვა-გააქტიურება.

  • მეწყერი განვითარდა ფერდობის ქვედა ნაწილში, ძლიერ ციცაბოდ დახრილ ზედაპირზე.
  • მეწყრული მასა, სავარაუდოდ, 150 000 კუბური მეტრია.
  • სააგენტოს განმარტებით, მეწყერი, ძირითადად, ბოლო 3 დღის განმავლობაში მოსულ უხვ ნალექს უკავშირდება — კერძოდ, ქუთაისში, ზესტაფონში და დიმში, მეტეოროლოგიური სადგურების მონაცემებით, მოსული ატმოსფერული ნალექების რაოდენობამ 80-100მმ შეადგინა, რაც თებერვლის თვის კლიმატური ნორმის 50-80%-ს შეადგენდა.
  • ასევე, 6 თებერვალს, დიდთოვლობის შედეგად, ხულოს მუნიციპალიტეტში ჩამოწვა ზვავი, ხოლო ქედის მუნიციპალიტეტში განვითარდა მეწყრული პროცესები.
  • ასევე, მიმდინარე წლის 6 თებერვალს, ხარაგაულის მუნიციპალიტეტის სოფელ მოლითში ჩამოწვა მეწყერი.
  • "კლიმატური ცვლილებების ფონზე, სამწუხაროდ, ჩვენ ვხედავთ, რომ გახშირებულია სტიქიური მოვლენები, როგორც მთელ მსოფლიოში, ასევე საქართველოში. კლიმატური ცვლილებები იწვევს განსაკუთრებით უხვ ნალექებს, რაც მაპროვოცირებელი ფაქტორი ხდება თანმდევი სტიქიების, როგორიც არის წყალდიდობები, წყალმოვარდნები, მეწყრები და ღვარცოფები. უხვი ნალექის მოსვლამ საქართველოს მთელ ტერიტორიაზე, უფრო მეტად დასავლეთ საქართველოში გააქტიურა მეწყრული პროცესები, განსაკუთრებით მაღალმთიან ზონებში.
    სსიპ გარემოს ეროვნული სააგენტოს სპეციალისტები ადგილზე სწავლობენ ვითარებას", — ნათქვამია სააგენტოს განცხადებაში.

ბოლო ხაზი: აჭარაში სტიქიას გუშინ 2 ადამიანი ემსხვერპლა.

  • დღეს კი, ბაღდათის მუნიციპალიტეტში, სოფელ ნერგეეთში, მეწყერის ჩამოწოლის შედეგად 4 ადამიანი დაიღუპა, ხუთს ამ დრომდე ეძებენ.