არქიმანდრიტ ილია თოლორაიას მღვდელმოქმედების უფლება აეკრძალა — შესაბამის ბრძანებას ხელი საქართველოს კათოლიკოს პატრიარქმა, ილია მეორემ მოაწერა.

საპატრიარქოს მიერ გავრცელებულ განცხადებაში წერია, რომ არქიმანდრიტს მღვდელმოქმედების უფლება "ეპისკოპოსის სიტყვიერი შეურაცხყოფისა და ზოგადად ეკლესიის იერარქებისადმი ცილისმწამებლური განცხადებებისათვის" აეკრძალა.

"სამების საპატრიარქო ლავრის მღვდელმსახურს, არქიმანდრიტ ილიას (თოლორაია), ეპისკოპოსის სიტყვიერი შეურაცხყოფისა და ზოგადად ეკლესიის იერარქებისადმი ცილისმწამებლური განცხადებებისათვის, ეპარქიალური კომისიის წარდგინების საფუძველზე, აეკრძალოს მღვდელმოქმედების უფლება, ვიდრე არ გამოავლენს გულწრფელ სინანულს", — წერია საპატრიარქოს განცხადებაში.

ცნობისთვის, არქიმანდრიტი ილია თოლორაია დღეს საპატრიარქოში იყო დაბარებული, სადაც მისგან მღვდელმთავრები მონანიებას ითხოვდნენ. მას შემდეგ, რაც არქიმანდრიტმა საპატრიარქო დატოვა განაცხადა, რომ მონანიებას არ აპირებს და პატრიარქთან შეხვედრას ითხოვს.