შინაგან საქმეთა სამინისტროს ინფორმაციით, კანონიერი ქურდის ძმის, ლევან ჯანგველაძის მკვლელობის საქმეზე ბიზნესმენი დავით მიქაძის დაცვა დააკავეს, ხოლო დავით მიქაძეს ბრალი დაუსწრებლად შეეფარდა.

"თბილისის პოლიციის დეპარტამენტის თანამშრომლების მიერ დაკავებულია დავით მიქაძის დაცვის უფროსი დავით ჩუბინიძე, რომლის მიმართაც გამოძიება სსკ-ის 236-ე მუხლის მე-6 და 237-ე მუხლის მე-3 ნაწილებით მიმდინარეობს.

გამოძიებით დადგენილია, რომ 2021 წლის სექტემბრის თვეში, დავით ჩუბინიძე და დავით მიქაძე, წინასწარი შეთანხმებით, ჯგუფურად დაეუფლნენ ვახტანგ კობიაშვილის სახელზე რეგისტრირებულ 5 ცალ ცეცხლსასროლ იარაღს, საიდანაც ერთ-ერთი მართლსაწინააღმდეგოდ გაასაღეს მესამე პირზე.

აღნიშნულ სისხლის სამართლის საქმეზე, ბრალდებულის სახით, დაკავებულია დავით მიქაძის დაცვის უფროსი დავით ჩუბინიძე, ხოლო თავად მიქაძეს ბრალი დაუსწრებლად წარედგინება," — განაცხადა შსს-მ ბრიფინგზე.

ცნობისთვის, "კანონიერი ქურდის", მერაბ ჯანგველაძის ძმის, ბიზნესმენ ლევან ჯანგველაძის მკვლელობაში ბრალდებულ გელა უძილაურს უვადო პატიმრობა მიესაჯა — გადაწყვეტილება მოსამართლე გიორგი გელაშვილმა მიიღო. სასამართლომ ყოფილი სპეცრაზმელი განზრახ და ასევე შეკვეთით მკვლელობაში დამნაშავედ ცნო.

უძილაურის განაჩენით ჯანგველაძის მკვლელობის საქმის გამოძიება არ სრულდება. გამოძიება გრძელდება მკვლელობასთან დაკავშირებულ ორ საქმეზე — სანდრო (ჯანო) წივწივაძისა და ძმები მიქაძეების საქმეზე.

სანდრო (ჯანო) წივწივაძეს ბრალად ედება იმ იარაღის "გასხვისება", რომლითაც ლევან ჯანგველაძე მოკლეს. გელა უძილაურის რწმუნებით, იარაღი, რომლითაც ჯანგველაძეს ესროლა ისმა მეგობარმა, ვალერი თანიაშვილმა მკვლელობამდე ცოტა ხნით ადრე აჩუქა — პროკურატურის განმარტებით, თანიაშვილი გარდაცვლილია.
პროკურატურის ვერსიით, ძმებმა დავით და გიორგი მიქაძეებმა ბიზნესსაქმიანობასთან დაკავშირებულ და სხვადასხვა საკითხებზე დაპირისპირებულების მოტივით ლევან ჯანგველაძის შეკვეთილი მკვლელობის ორგანიზება მოახდინეს — მკვლელობის შესრულება გელა უძილაურს დაავალეს. უძილაურმა სასამართლო პროცესზე უარყო ძმების ცნობა.

მედიაში გავრცელებული ინფორმაციით, ძმები მიქაძეები კრიმინალურ სამყაროსთან და ოთარ ფირცხალაძესთან დაახლოებული პირები არიან.