ამერიკელი პოპვარსკვლავი ბილი აილიში ყოველთვის გამოირჩეოდა საკუთარი აზრის თამამად გამოთქმით და ეს არც 2025 წლის ინოვატორების დაჯილდოებაზე არ შეცვლილა — 23 წლის მომღერალმა სცენიდან მილიარდერებს მიმართა, მაშინ, როცა ზოგიერთი მათგანი დარბაზში იმყოფებოდა.

29 ოქტომბერს გამართულ ცერემონიაზე ბილის ინოვატორი მუსიკოსის ჯილდო გადაეცა. სანამ ახალგაზრდა მომღერალი სცენაზე ავიდოდა, წამყვანმა სტივენ კოლბერმა გამოაცხადა ბილის გადაწყვეტილების შესახებ, რომ მუსიკალური ტურნედან მიღებული $11,5 მილიონი გადასცეს საქველმოქმედო ორგანიზაციებს, რომლებიც საკვების უსაფრთხოებასა და კლიმატის ცვლილების პრობლემებზე მუშაობენ.

ბილი აილიში ტურნეზე

ბილი აილიში ტურნეზე

ფოტო: Getty Images

ბილის სცენაზე ასვლისას დარბაზში უამრავი მდიდარი და გავლენიანი სტუმარი იმყოფებოდა. მათ შორის მარკ ზაკერბერგიც იყო, რომელიც ღონისძიებაზე თავისი მეუღლის მხარდასაჭერად მივიდა. Forbes-ის მიხედვით ზაკერბერგი, რომლის ქონებაც $228 მილიარდს შეადგენს, მსოფლიოში უმდიდრეს ადამიანებს შორის მეხუთეა.

მარკ ზაკერბერგი მეუღლესთან ერთად

მარკ ზაკერბერგი მეუღლესთან ერთად

ფოტო: People

აილიში ჯილდოს მიღების შემდეგ სიტყვით გამოვიდა: "ჩვენს ქვეყანაში ხალხს თანაგრძნობა და დახმარება სჭირდება. თუ ფული გაქვთ, აჯობებს, კარგი საქმისთვის გამოიყენოთ და მათ მისცეთ, ვისაც ეს სჭირდება."

გამოსვლა კი დაასრულა სიტყვებით, რომლებმაც ინტერნეტი აალაპარაკა:

ყველა მიყვარხართ, მაგრამ აქ მყოფ რამდენიმე ადამიანს ჩემზე ბევრად მეტი ფული აქვს. თუ მილიარდერი ხარ, რატომ? ცუდად არ მიიღოთ, უბრალოდ გაეცით თქვენი ფული, მეგობრებო

ტურნეს ფარგლებში თანხის შეგროვების გარდა, მომღერალი მრავალი სხვა გზითაც ცდილობს ქველმოქმედებასა და გარემოს დაცვას. ის კონცერტებზე დამსწრეებს მცენარეულ საკვებს სთავაზობს, ყიდის გადამუშავებადი მასალისგან დამზადებულ პროდუქციას, მოუწოდებს ფანებს, რომ თან იქონიონ მრავალჯერადი გამოყენების წყლის ბოთლები და საკონცერტო მოედნებზე საზოგადოებრივი ტრანსპორტით მივიდნენ.

ფოტო: People

ბილიმ არაერთხელ გააკრიტიკა მუსიკალურ ინდუსტრიაში არსებული პრობლემებიც:

"ჩემთვის, როგორც ადამიანისთვის, რომელიც ყველაფერს აკეთებს იმისთვის, რომ იყოს ეკომეგობრული და ცდილობს ამაში გუნდის ყველა წევრიც ჩართოს, ეს ყველაფერი ძალიან გამაღიზიანებელია," – განაცხადა აილიშმა. "მსოფლიოს უდიდესი არტისტები ერთი ალბომის დაახლოებით 40 სხვადასხვა ვინილის ვარიანტს გამოსცემენ, რომლებსაც მცირე განსხვავებული დეტალები აქვს, რათა მომხმარებელს მეტი მიჰყიდონ".

იხილეთ ბილი აილიშის სიტყვით გამოსვლა 2025 წლის ინოვატორების დაჯილდოებაზე: