"სოციალური სამართლიანობის ცენტრი", მელიქიშვილის გამზირზე, 2 თვის წინ, თბილისის მერის, კახა კალაძის საარჩევნო შტაბთან განვითარებულ მოვლენებთან დაკავშირებით განცხადებას ავრცელებს. მათი განმარტებით, შეკრების დაზარალებული მონაწილეების ნაწილი კვლავ არ არის გამოკითხული და მიუხედავად იმისა, რომ თავდამსხმელთა ნაწილი მედიის მიერ გავრცელებულ კადრებში იდენტიფიცირებადია, არც ერთი პირი არაა დაკავებული. მათივე თქმით, "აშკარაა, რომ სამართალდამცავი უწყებები საქმეს განზრახ არ იძიებენ".

"მელიქიშვილის გამზირზე შეკრების მონაწილეებზე თავდასხმიდან თითქმის 2 თვის შემდეგ, დაზარალებულთა ნაწილი კვლავ არ არის გამოკითხული, დაშავებულებს არ აქვთ დაზარალებულის სტატუსი, ხოლო პასუხისგებაში არ მიცემულა არც ერთი პირი — მიუხედავად იმისა, რომ თავდამსხმელთა დიდი ნაწილი მედიის მიერ გავრცელებულ კადრებში იდენტიფიცირებადია.

გამოძიების ფუნდამენტური ჩავარდნების გათვალისწინებით, აშკარაა, რომ სამართალდამცავი უწყებები საქმეს განზრახ არ იძიებენ და, შესაბამისად, ხელს აფარებენ ორგანიზებულ თავდასხმაში მონაწილე პირებს.

შსს-ს ამ დრომდე არ ჩაუტარებია მნიშვნელოვანი საგამოძიებო მოქმედებები და პასუხისგებაში არ მიუცია ძალადობრივი თავდასხმის არც ერთი მონაწილე. საქმის გამოძიებასთან დაკავშირებით, მათ შორის, პრობლემურია შემდეგი გარემოებები

— შსს-ს არ გამოუკითხავს დაზარალებულები, რომელთა შესახებაც უწყებას სოციალური სამართლიანობის ცენტრმა მიმართა;

— შსს-ს ამ დრომდე არ გამოუკითხავს პუბლიკის ჟურნალისტზე, ქეთო მიქაძეზე თავდამსხმელი და ძალადობის სხვა მონაწილეები;

— საქმეს იძიებს თბილისის პოლიციის დეპარტამენტი, რომლის დირექტორის მოადგილე ინციდენტის ერთ-ერთ ეპიზოდში თავად მონაწილეობდა;

— გამოძიება მიმდინარეობს ჯგუფური ძალადობის მუხლით, რაც ქმედების ორგანიზებულ ხასიათს სათანადოდ არ ასახავს", — წერია სოციალური სამართლიანობის ცენტრის განცხადებაში.

ცენტრი პასუხისმგებელ უწყებებს მოუწოდებს დროულად დაადგინონ სავარაუდო მოძალადეების ვინაობა და "უზრუნველყონ ჯეროვანი გამოძიების წარმართვა სათანადო კვალიფიკაციით".

"ჩვენ კიდევ ერთხელ მოვუწოდებთ შესაბამის უწყებებს და გამოძიებაზე პასუხისმგებელ კონკრეტულ საჯარო მოხელეებს, დროულად მოახდინონ სავარაუდო მოძალადეების იდენტიფიცირება, გამოიკითხონ აქციაზე დაშავებული პირები, მიანიჭონ მათ დაზარალებულის სტატუსი და უზრუნველყონ ჯეროვანი გამოძიების წარმართვა სათანადო კვალიფიკაციით", — წერია განცხადებაში.