მოკლედ: შუაღამისას მომხდარმა მიწისძვრამ ჩინეთში, სულ მცირე, 118 ადამიანი იმსხვერპლა.

  • ეპიცენტრი მთიან რეგიონში იყო, სადაც ახლა ძალიან დაბალი ტემპერატურაა.

დეტალები: განსუსა და ცინხაის პროვინციებში სამაშველო ოპერაციები მიმდინარეობს. მიწისძვრის შედეგად დაშავდა 500-ზე მეტი ადამიანი, დაზიანებულია შენობები და გზები, არ არის ელექტროენერგია, ინტერნეტი და სატელეფონო კავშირი.

  • მიწისძვრის სიმძლავრემ 6.2 შეადგინა.
  • გამთენიისას, განსუში დაადასტურეს 105 ადამიანის გარდაცვალება, 397 დაშავდა, 16 მძიმე მდგომარეობაშია.
  • ცინხაიში დაიღუპა 13, დაშავდა 183 ადამიანი. ასევე, ცინხაიში ეძებენ 20 დაკარგულ ადამიანს, ისინი მეწყერმა მოიყოლა.
  • ნგრევის ზონაში გასაშლელი საწოლები, პლედები და კარვები გაგზავნეს. ღამით, ამ პროვინციებში -15 გრადუსი იყო.
  • სამაშველო სამუშაოებში ჩართულია სულ მცირე 4 ათასი მეხანძრე, სამხედრო და პოლიციელი.
კარვები ჩინეთში

კარვები ჩინეთში

ფოტო: Getty

ბოლო ხაზი: მიწისძვრა დასავლეთ ჩინეთის მთიან რეგიონებში ხშირად ხდება. გასულ წელს, სექტემბერში, 6.8 მაგნიტუდის სიმძლავრის მიწისძვრას, სულ მცირე, 74 ადამიანი ემსხვერპლა სამხრეთ-დასავლეთით მდებარე სიჩუანის პროვინციაში. მიწისძვრას მეწყერი მოჰყვა პროვინციის დედაქალაქ ჩენდუში, სადაც 21 მილიონი ადამიანი კოვიდის გამო ლოკდაუნში იმყოფებოდა.

ჩინეთში ბოლო დროის ყველაზე ძლიერი მიწისძვრა 2008 წელს მოხდა, მაშინ სიმძლავრემ 7.9 მაგნიტუდა შეადგინა და სიჩუანში, თითქმის, 90 000 ადამიანი იმსხვერპლა. სტიქიამ გაანადგურა ქალაქები, სკოლები და ჩენდუს გარშემო მდებარე სოფლები.