"საერთაშორისო გამჭვირვალობა — საქართველო" (TI) მიიჩნევს, რომ საპარლამენტო უმრავლესობის ინიციატივის მიზანი დეპუტატებისთვის მეტი კომფორტის შექმნაა.

  • ორგანიზაციის წერილში ნათქვამია, რომ საკანონმდებლო ცვლილებებით პარლამენტის ღიაობა ყველა მიმართულებით უარესდება.
  • დადებითად მხოლოდ ფარული კენჭისყრის გაუქმება შეიძლება იქნას მიჩნეული.

რა ცვლილებაზეა საუბარი?

  • ინიციატივა საპარლამენტო უმრავლესობის დეპუტატებს ეკუთვნით, და მათ შორის, საქართველოს პარლამენტის თავმჯდომარეს, შალვა პაპუაშვილს, ასევე, გურამ მაჭარაშვილს — ღიად ანტიდასავლური მოძრაობიდან ხალხის ძალა.
  • მათ მიერ შეთავაზებული ახალი წესით, კენჭისყრის პროცედურის ჩატარებისთვის, პლენარული სხდომის თავმჯდომარეს შეუძლია მიმდინარე საკითხის განხილვა შეაჩეროს.
  • იცვლება პარლამენტის სასახლეში უსაფრთხოების დაცვის რეჟიმთან დაკავშირებული რეგულაციები.
  • იზრდება პარლამენტის თავმჯდომარის მოადგილეების რაოდენობა: ნაცვლად 2-2 მოადგილისა, პარლამენტის თავმჯდომარის მოადგილედ შესაძლებელია აირჩეს 3 მოადგილე საპარლამენტო უმრავლესობიდან და 3 — საპარლამენტო ოპოზიციაში შემავალი ფრაქციებიდან.

რა არის პრობლემა: TI-ს მიიჩნევს, რომ რადგანაც პლენარულ სხდომაზე, საკითხების განხილვას დეპუტატების დიდი ნაწილი არ ესწრება და ისინი დარბაზში მხოლოდ კენჭისყრისთვის შედიან, ახალი წესი კიდევ უფრო მეტ კომფორტს შეუქმნის მათ და შესაძლებლობას მისცემს, წინასწარ ცნობილ დროს, მხოლოდ კენჭისყრისათვის მივიდნენ სხდომაზე.

  • ასევე, პრობლემურია დაჩქარებული წესით კანონის მიღების კიდევ უფრო გამარტივება, ცვლილებით ერთ დღეს ორი მოსმენით კანონის მიღების პროცედურა ბიუროს თანხმობის გარეშე იქნება შესაძლებელი.

საპარლამენტო კონტროლის და ანგარიშვალდებულების გაუარესება: TI აცხადებს, რომ წარმოდგენილი ცვლილებებით მნიშვნელოვანი ანგარიშების პლენარულ სხდომაზე განხილვის ვალდებულება უქმდება, ისევე, როგორც კომიტეტის ანგარიშების პლენარულ სხდომაზე განხილვის ვალდებულებაც.

  • ეს ცვლილებები კი, TI-ს შეფასებით, საპარლამენტო კონტროლსა და ღიაობას მნიშვნელოვნად აუარესებს.
  • ცვლილებებით, ასევე, იკრძალება კომიტეტის სხდომიდან ტელერეპორტაჟი. საერთაშორისო გამჭვირვალობის აზრით, იმ შემთხვევაში თუ სხდომა არ არის დახურული, მედიას უნდა ჰქონდეს უფლება, აწარმოოს ტელერეპორტაჟი და მიაწოდოს საზოგადოებას ინფორმაცია პოლიტიკური და საკანონმდებლო მოვლენების შესახებ.

ოპოზიციონერი დეპუტატების უფლებების შეზღუდვა: TI მიზანშეუწონლად მიიჩნევს კომიტეტის სხდომაზე გამომსვლელთა რიგითობას და გამოსვლის დროის განსაზღვრას საკითხის კომიტეტის თავმჯდომარის ინიციატივით და სხდომაზე დამსწრეთა უმრავლესობით, რადგან ყველა კომიტეტის თავმჯდომარე უმრავლესობის წევრია და ოპოზიციონერ დეპუტატებს, აზრის გამოხატვის საშუალება, შესაძლოა, შეეზღუდოთ.