ადვილად დასამახსოვრებელი, მიმზიდველი, გულშიჩამწვდომი, ინტიმური, ზოგჯერ ცეცხლოვანი, ზოგჯერ კი სევდიანი, იუმორისტული და სარკასტული — ასეთია მიუზიკლ ჩიკაგოს კომპოზიციები და სიმღერის ტექსტები, რომლებიც რთულია მოსმენის შემდეგ დაივიწყოთ. კარგი ამბავი კი ის არის, რომ ლეგენდარული მიუზიკლის ნახვას ამიერიდან საქართველოშიც შეძლებთ და, შესაბამისად, მასში გაჟღერებული კომპოზიციებითაც ისიამოვნებთ.

ჩიკაგოს წარმდგენი და სპონსორია არქი — ლიდერი დეველოპერული კომპანია საქართველოში.

ჩიკაგო წისქვილის ჯგუფის თეატრის ახალი გრანდიოზული დადგმაა, რომელიც ქართული აუდიტორიის წინაშე უკვე წარსდგა. მან მაყურებელთა დიდი მოწონება უკვე დაიმსახურა, რაც გასაკვირი სულაც არ არის, რადგან ჩიკაგო ერთ-ერთი ყველაზე პოპულარული მიუზიკლია მსოფლიო თეატრის ისტორიაში. მისი ამგვარი წარმატება კი, დაუვიწყარი სიუჟეტისა და საკულტოდ ქცეული ქორეოგრაფიის გარდა, მუსიკამ განსაზღვრა.

ჩიკაგოსთვის მუსიკა კომპოზიტორმა ჯონ კენდერმა შექმნა. ის ჯაზის ელემენტებითაა გაჯერებული და ვოდევილის ჟანრის ძლიერ გავლენას განიცდის. მიუზიკლის მუსიკალური ნომრები არაჩვეულებრივად გამოხატავს გასული საუკუნის 20-იანი წლების ეპოქას — მის სულსა და განწყობებს. არანაკლებ მნიშვნელოვანია კომპოზიციების მახვილგონივრული ტექსტები, რომლებზეც ლირიკოსმა ფერდებმა იმუშავა. სატირით, შავი იუმორით გაჯერებული ტექსტები, რომლებშიც ავტორი ოსტატურად თამაშობს სიტყვებით, უნიკალურ სიუჟეტურ ქარგას ქმნის. ამასთან ერთად, კიდევ უფრო სიღრმისეულად გამოკვეთს პერსონაჟთა ხასიათს. ჩიკაგოს ქართული დადგმისთვის ტექსტზე თეა და სოსო ყიფშიძეებმა იმუშავეს.

მუსიკის ტექსტებზე კი ირინა სანიკიძემ, რომელმაც ნამდვილად ოსტატურად შეძლო ისე აეჟღერებინა მუსიკა, თითქოს ქართულად დაიწერა.

"ეს უბრალოდ მიუზიკლი არ არის, ეს არის ვოდევილი, რომელშიც ყველაფერია ნაჩვენები. ავტორს არ დაუწერია არც ერთი სიტყვა ტყუილად და არ მეგონა ამხელა სიღრმეს თუ შევეჯახებოდი", – ამბობს თეა ყიფშიძე.

ჩიკაგოს მუსიკალურ ხელმძღვანელი კი თამუნა არჩვაძე გახლავთ, რომელმაც შეძლო და ერთნაირი წარმატებით აამღერა როგორც პროფესიონალი, ისე არაპროფესიონალი მომღერლები.

"ჩიკაგო არის ურთულესი შესასრულებელი და რა საკვირველია, ის ძალიან დიდი შრომისა და ენერგიის ფასად შეიქმნა. „თეატრში“ გვყავს პროფესიონალი მომღერლები, მაგრამ არა არტისტები და, პირიქით, არტისტები, მაგრამ არა მომღერლები. ეს სინთეზი ჩემთვის კიდევ უფრო დიდი გამოწვევა იყო, მაგრამ, ამავე დროს, საინტერესო. ვფიქრობ, საბოლოო ჯამში, თავი ყველამ ძალიან კარგად გაართვა. რაც ყველაზე მნიშვნელოვანია, არცერთი სიტყვა არ არის ჩაწერილი, არ არის ფონოგრამა, მასიური სცენები და ბექებიც კი. თავიდან ბოლომდე ცოცხლად შესრულებაა.", – გვითხრა თამუნა არჩვაძემ.

„ჩიკაგო წისქვილის თეატრში თვეში ორჯერ გაიმართება, რა საკვირველია, ტრადიციულად, საუცხოო ვახშმის თანხლებით. კალენდრის სანახავად გადადით თეატრის ოფიციალურ ვებგვერდზე და დაჯავშნეთ ბილეთი თქვენთვის სასურველ დროს.