რატომ არის მნიშვნელოვანი: 2022 წლის 24 თებერვლიდან, მას შემდეგ რუსეთმა უკრაინაში სრულმასშტაბიანი ომი დაიწყო, საერთაშორისო საზოგადოებამ რუსეთს არაერთი სანქცია დაუწესა.

• 14 სექტემბერს აშშ-ის სახელმწიფო დეპარტამენტმა სანქციების მორიგი პაკეტის შესახებ გაავრცელა ინფორმაცია.
• სანქცირებულთა სიაში მოხვდა საქართველოს ყოფილი გენერალური პროკურორი, ოთარ ფარცხალაძეც, რომელიც სახელმწიფო დეპარტამენტის განცხადებაში მოხსენიებულია, როგორც ქართველი-რუსი ოლიგარქი.
• დოკუმენტში აღნიშნულია, რომ ფარცხალაძე საქმიანობდა რუსეთის ფედერაციის ეკონომიკის მენეჯმენტის საკონსულტაციო სექტორში და კომპანიებში — LLC MOSCOW BUSINESS BROKERAGE და LLC INTERNATIONAL BUSINESS CORPORATION 50%-ს ფლობს.
• სახდეპის განცხადებით, მათ მიერ სანქცირებული კიდევ ერთი პირი, ალექსანდრ ონიშჩენკო, სავარაუდოდ, დაეხმარა თავის თანამოაზრე ფარცხალაძეს, მოეპოვებინა რუსეთის მოქალაქეობა.
• მათი თქმით, ფარცხალაძემ სრულად მიიღო რუსული იდენტობა და რეგულარულად მოგზაურობს რუსეთში.
• დოკუმენტში ასევე აღნიშნულია, რომ ონიშჩენკომ და FSB-მ ფარცხალაძე გამოიყენეს "ქართულ საზოგადოებასა და პოლიტიკაზე რუსეთის საკეთილდღეო გავლენის მოხდენისთვის".

მოკლედ ფარცხალაძეზე: ოთარ ფარცხალაძე მთავარი პროკურორის პოსტზე 2013 წელს დაინიშნა და სულ 47 დღის განმავლობაში იმუშავა.

• ფარცხალაძის დანიშვნიდან მალევე განხილვის თემად იქცა მისი განათლების შესაბამისობა პოსტთან. რის პასუხადაც ყოფილმა პროკურორმა დიპლომის ასლი გამოაქვეყნა, რომლითაც ადასტურებდა, რომ სამართალმცოდნეობის ფაკულტეტზე სწავლობდა.
• მალევე, ნაციონალურმა მოძრაობამ გაავრცელა ინფორმაცია, რომ პროკურორი გერმანიაში ქურდობის ბრალდებით იყო ნასამართლევი — ფარცხალაძემ ბრალდება უარყო და განაცხადა, რომ გერმანიის სასამართლომ მხოლოდ სამართალდამცავთან შელაპარაკების ბრალდება დაუდგინა.
• ყოფილი პროკურორი ამტკიცებდა, რომ მის წინააღმდეგ აგორებული ბრალდებები იყო მორიგი ბინძური კამპანია უწყების წინააღმდეგ, მიუხედავად ამისა, ამ განცხადებიდან 6 დღეში, 2013 წლის 30 დეკემბერს ფარცხალაძემ განაცხადა, რომ ბიოგრაფიასთან დაკავშირებული კითხვების გამო თანამდებობას ტოვებდა.
• ფარცხალაძის შესაძლო გავლენებს პოლიტიკურ წრეებში მისი უწყებიდან წასვლის შემდეგ არაერთი წლის განმავლობაში განიხილავდნენ.
• ის ფიგურირებდა ვანო მერაბიშვილის საკნიდან გაყვანისა და გენერალური აუდიტორის ლაშა თორდიას ცემის საქმეში, ასევე, მირზა სუბელიანის ჩანაწერებში — დამატებითი ინფორმაცია შეგიძლიათ ნახოთ აქ.

დეტალები: პროკურატურის განცხადებით, ფარცხალაძის დასანქცირების შემდეგ "ზოგიერთი პოლიტიკური გაერთიანების წარმომადგენლებმა" უწყების წინააღმდეგ დეზინფორმაციული კამპანია წამოიწყეს.

• მათი მტკიცებით, კამპანიის საბოლოო მიზანი ამ ინსტიტუტის დისკრედიტაციისა და საზოგადოების შეცდომაში შეყვანის მცდელობაა.
• ისინი უარყოფენ კავშირს ოთარ ფარცხალაძესთან და ამბობენ, რომ 2013 წლის შემდეგ მას საქართველოს პროკურატურის საქმიანობასთან შემხებლობა არ ჰქონია და "არც შეიძლება, რომ ჰქონოდა".
• პროკურატურა პასუხობს მიხეილ სააკაშვილის განცხადებასაც, რომელშიც ის აღნიშნავს, რომ მის წინააღმდეგ აღძრული საქმეები სწორედ ფარცხალაძის მიერ თანხმდება ივანიშვილთან და მოსკოვთან.
• "როგორც აღვნიშნეთ, ოთარ ფარცხალაძემ თანამდებობა დატოვა 2013 წელს, ხოლო პირველად სისხლისსამართლებრივი დევნა მიხეილ სააკაშვილის მიმართ დაიწყო 2014 წლის 28 ივლისს", — წერს პროკურატურა.
• განცხადებაში ასევე აღნიშნულია, რომ ფარცხალაძესთან დაკავშირებით გამოძიება მიმდინარეობს სახელმწიფო უსაფრთხოების სამსახურში და "მასზე მოხდება ეფექტიანი სამართლებრივი რეაგირება".