რა ხდება: გამოცემა The Insider ვრცელ საგამოძიებო მასალას აქვეყნებს, სადაც რუსეთიდან წასული ჟურნალისტების ისტორიებია მოთხრობილი.

  • ისინი ვარაუდობენ, რომ ევროპის სხვადასხვა ქალაქში ყოფნისას კრემლთან დაკავშირებულმა პირებმა მოწამლეს.
  • ერთ-ერთი ჟურნალისტი, ირინა ბაბლოიანი ფიქრობს, რომ ეს თბილისში მოხდა.

რას ჰყვება ბაბლოიანი: ეხო მასკვის ჟურნალისტი მოსკოვიდან თბილისში ოქტომბრის შუა რიცხვებში გადავიდა და სასტუმრო კინგ თამარში ცხოვრობდა.

  • როგორც გამოცემა წერს, 25 ოქტომბრის საღამოს ის თავს კარგად ვერ გრძნობდა, მეორე დილით კი ძლიერი სისუსტითა და თავბრუსხვევით გაიღვიძა.
  • "მიუხედავად ამ უცნაური პირველი სიმპტომებისა, ირინამ გადაწყვიტა, უარი არ ეთქვა ერევანში მოგზაურობაზე, სადაც 27 ოქტომბრის ღამეს მანქანით წავიდა. მანქანაში ძალიან ცუდად გახდა, გონება დაბინდული ჰქონდა, კონცენტრაციას ვერ ახერხებდა", — წერს ინსაიდერი.
  • "შეგრძნება მქონდა, რომ სხეული მე აღარ მეკუთვნოდა", — იხსენებს ჟურნალისტი.

  • გამოცემის ცნობით, სისუსტე, ტკივილი და უძილობა გაქრა, დაახლოებით, ორი დღის შემდეგ, სიწითლე კანზე კი კვლავ ჩნდება.

  • The Insider-ის ინფორმაციით, ჟურნალისტს მაშინვე არ მიუმართავს ტოქსიკოლოგისთვის, რადგან მოწამვლაზე არ უფიქრია და შესაბამისი ანალიზი მხოლოდ რამდენიმე თვის შემდეგ, ბერლინში ჩაიტარა.

  • ჟურნალისტი ჰყვება, რომ საავადმყოფოში სისხლის სინჯების დაკარგვაზე აცნობეს, რის შემდეგაც ის პოლიციამ დაკითხა და ტოქსიკოლოგიური ტესტები ხელახლა ჩააბარა, თუმცა მოწამვლის რაიმე კვალის აღმოსაჩენად ძალიან დიდი დრო გავიდა.

The Insider-ის მიერ გამოკითხული ექსპერტების აზრით, ჟურნალისტის გარეგანი მოწამვლის ვერსია უფრო სავარაუდოა.

  • "იძლევა ვარაუდის გაკეთების საშუალებას, რომ შეიძლებოდა მომხდარიყო მომწამვლელი აგენტის გამოყენება, მაგრამ მაინც ძნელი სათქმელია, რომლის, რადგან ირინას შემთხვევაში მწირია სამედიცინო ანალიზების პასუხები", — ამბობენ ისინი.