საგარეო ურთიერთობათა კომიტეტის თავმჯდომარე, ნიკოლოზ სამხარაძე ვაშინგტონში გამართულ სუვერენული ერების ალიანსის კონფერენციაში მონაწილეობს.

ნიკოლოზ სამხარაძემ იმედი გამოთქვა, რომ ახალი ადმინისტრაციის პირობებში, ქართულ-ამერიკული ურთიერთობები კიდევ უფრო გაღრმავდება.

"ახალი ადმინისტრაციის არჩევასთან ერთად, ჩვენ გვაქვს დიდი იმედი, რადგან იდეოლოგიურად ერთსა და იმავე პოზიციაზე ვართ. ჩვენი ღირებულებები — ქრისტიანული და ტრადიციული ფასეულობები — არის ჩვენი საშინაო და საგარეო პოლიტიკის საფუძველი. შესაბამისად, ვიმედოვნებთ, რომ ახალი ადმინისტრაციის პირობებში, პირველ რიგში, ქართულ-ამერიკული ურთიერთობები კიდევ უფრო გაღრმავდება და აყვავდება, და მეორე — ჩვენ ერთად დავდგებით სუვერენიტეტის, დემოკრატიის, სიტყვის თავისუფლებისა და არჩევნების დასაცავად ჩვენს ქვეყნებში", — აღნიშნა ნიკოლოზ სამხარაძემ.

ამას გარდა, კონფერენციაზე სიტყვით გამოსვლისას მან ქვეყნის ოკუპაცია ახსენა და ტერიტორიული მთლიანობის აღდგენაზეც ისაუბრა.

"მე წარმოვადგენ მმართველ პარტიას, ქართულ ოცნებას და ჩვენი ქართული ოცნებაა, გვქონდეს სრული სუვერენიტეტი ჩვენს ქვეყანაზე. ჩვენ ვართ ნაწილობრივ ოკუპირებული ქვეყანა — ჩვენი ტერიტორიების 20% ოკუპირებულია რუსეთის ფედერაციის მიერ, ამიტომ ჩვენი ოცნებაა ტერიტორიული მთლიანობის აღდგენა და ჩვენი ხალხის ეკონომიკური კეთილდღეობის უზრუნველყოფა. შესაბამისად, ჩვენ მიგვაჩნია, რომ ხალხის სუვერენიტეტსა და სუვერენულ გადაწყვეტილებებს პატივი უნდა ვცეთ", — განაცხადა ნიკოლოზ სამხარაძემ კონფერენციაზე სიტყვით გამოსვლისას.