პროკურატურამ 2025 წლის 8 სექტემბერს, კალაძის საარჩევნო შტაბთან დაპირისპირების დროს პუბლიკას 2 ჟურნალისტისთვის პროფესიულ საქმიანობაში ხელის შეშლისთვის 2 პირს — ლევან ზარდიაშვილს და საბა მინდიაშვილს ბრალდება წარუდგინა.

პუბლიკას ინფორმაციით, ბრალის წარდგენა დღეს მოხდა და ჯერ-ჯერობით უცნობია, როდის მიმართავს პროკურატურა სასამართლოს აღმკვეთი ღონისძიების შეფარდებაზე — უწყების ცნობით, ამ დროისთვის არც ერთი ბრალდებული არ არის დაკავებული.

2025 წლის 8 სექტემბერს, ლევან ზარდიაშვილმა პუბლიკას ჟურნალისტ ქეთო მიქაძეზე ფიზიკურად იძალადა და ძალის გამოყენებით ტელეფონი წაართვა. კალაძის შტაბთან, ამავე დღეს "პუბლიკას" ჟურნალისტს, ლექსო ქეშელაშვილს გაშუქებისას ტელეფონი წაართვეს, რომელიც მოგვიანებით დაიბრუნა.

აღნიშნულ პირებს ბრალი სსკ-ის 154-ე მუხლის პირველი ნაწილით აქვთ წარდგენილი, რაც ჟურნალისტისთვის პროფესიულ საქმიანობაში უკანონოდ ხელის შეშლას გულისხმობს, რაც ისჯება ჯარიმით ან საზოგადოებისათვის სასარგებლო შრომით ან გამასწორებელი სამუშაოთი ანდა შინაპატიმრობით ვადით ექვსი თვიდან ორ წლამდე.

შეგახსენებთ, შსს-მ 10 სექტემბერს კახა კალაძის საარჩევნო შტაბთან განვითარებულ ინციდენტთან დაკავშირებით 3 პირი დააკავა. ჯგუფური ძალადობის ბრალდებით დაკავებულებს შორის იყვნენ ზაზა მუმლაძე, რომელმაც აქტივისტ ქეთი ალავერდაშვილს სახეში სილა გააწნა და ირაკლი ბუაჩიძე, რომელიც რეზინის ხელკეტის გამოყენებით აქციის მონაწილეებს უსწორდებოდა. 23 წლის მეგი დიასამიძე კახი კალაძის საარჩევნო ბანერზე "რუსული ოცნების" დაწერისთვის სისხლის სამართლის ბრალდებით დააკავეს.

12 სექტემბერს, ზაზა მამალაძე ირაკლი ბუაჩიძე გაათავისუფლეს, ხოლო კახა კალაძის ბანერზე გაკეთებული წარწერისთვის დაკავებული 23 წლის აქტივისტი გირაოს საფუძველზე გაათავისუფლეს.

უწყების ინფორმაციით, "დაზარალებულმა აქტივისტებმა არ ითანამშრომლეს გამოძიებასთან და მათი ჩვენებებიდან გამომდინარე, შეუძლებელი გახდა ჯგუფური ძალადობის ბრალდებით დაკავებული ორი პირის პასუხისგებაში მიცემა".