კახა კალაძის საარჩევნო შტაბთან პუბლიკის ჟურნალისტებისთვის პროფესიულ საქმიანობაში ხელის შეშლისთვის ბრალდებულებს, ლევან ზარდიაშვილს და საბა მინდიაშვილს 3000-3000-ლარიანი გირაოები შეეფარდათ. მათ გირაოს გადასახდელად 40 დღე განესაზღვრათ. მოსამართლე მზია გარშაულიშვილმა ბრალდებულებისთვის გირაოს შეფარდებით პროკურატურის შუამდგომლობა დააკმაყოფილა.

პროკურატურამ ლევან ზარდიაშვილს და საბა მინდიაშვილს ბრალი 5 მარტს წარუდგინა. 2025 წლის 8 სექტემბერს, ლევან ზარდიაშვილმა პუბლიკას ჟურნალისტ ქეთო მიქაძეზე ფიზიკურად იძალადა და ძალის გამოყენებით ტელეფონი წაართვა. კალაძის შტაბთან, ამავე დღეს პუბლიკას ჟურნალისტს, ლექსო ქეშელაშვილს გაშუქებისას ტელეფონი წაართვეს, რომელიც მოგვიანებით დაიბრუნა.

აღნიშნულ პირებს ბრალი სსკ-ის 154-ე მუხლის პირველი ნაწილით ჰქონდათ წარდგენილი, რაც ჟურნალისტისთვის პროფესიულ საქმიანობაში უკანონოდ ხელის შეშლას გულისხმობს, რაც ისჯება ჯარიმით ან საზოგადოებისათვის სასარგებლო შრომით ან გამასწორებელი სამუშაოთი ანდა შინაპატიმრობით ვადით ექვსი თვიდან ორ წლამდე.