28 თებერვალს, ირანში, ქალაქ მინაბში დაწყებითი კლასების გოგონათა სკოლა დაიბომბა, რამაც 168 ადამიანი იმსხვერპლა. გარდაცვლილთა ზუსტი რაოდენობა ამ დროისთვის უცნობია. გავრცელებული ინფორმაციით, გარდაცვლილებიდან უმეტესობა 7-12 წლამდე ბავშვია.

The New York Times-ის გამოძიებით, სატელიტური სურათები და გადამოწმებული ვიდეოების გაანალიზება მიუთითებს, რომ სკოლის შენობა მნიშვნელოვნად დაზარალდა და მასზე ერთზე მეტი მიზნობრივი დარტყმა განხორციელდა.

The Guardians-ის ინფორმაციით, დაწყებითი კლასების სკოლა ისლამური რევოლუციის მცველთა კორპუსიდან (IRGC) 600 მეტრში მდებარეობდა, სკოლა სრულიად სამოქალაქო დაწესებულება იყო და 600 მეტრში არსებულ სამხედრო შენობისგან სრულიად განცალკევებით იდგა.

დაბომბვაში ამერიკის მხარის ბრალეულობაზეც Reuters-ის წერს. აშშ-ის სამხედრო გამოძიებათა წყაროების თანახმად არსებობს მოსაზრება, რომ ირანის გოგონათა სკოლაზე განხორციელებულ შეტევაზე აშშ-ის ძალები არიან პასუხისმგებელნი. 4 მარტს აშშ-ის თავდაცვის მდივანმა, პიტ ჰეგსეტმა დაადასტურა, რომ აშშ-ის არმია ინციდენტს იკვლევს. პენტაგონის პრესსპიკერმა კაპიტანმა ტიმოთი ჰოკინსმა Reuters-ს განუცხადა, რომ "თუკი ინციდენტი გამოძიების ეტაპზეა, კომენტარის გაკეთება უგუნურობა იქნება".

აშშ-ის სახელმწიფო მდივანმა მარკო რუბიომ აღნიშნულ თემაზე ჟურნალისტის დასმულ კითხვაზე პასუხისას განაცხადა, რომ თავს შეიკავებს პასუხის გაცემისგან და დასძინა "ომის დეპარტამენტი აღნიშნულ თავდასხმას იძიებს". რუბიომ ასევე განაცხადა, რომ ამერიკა სკოლას განზრახ არასდროს დაარტყამდა, ეს "ირანის სტილია".

"ვნახე ეს ცნობები, არ მაქვს [პასუხი]. განა იმიტომ, რომ პასუხზე თავს ვარიდებ, არამედ არ მინდა რამე არასწორად ვთქვა.

ცხადია, აშშ სკოლას მიზანში განზრახ არ ამოიღებდა — ჩვენი სამიზნეებია რაკეტები, მათი წარმოებისა და გაშვების შესაძლებლობები და კამიკაძე დრონები, ამაზე ვართ კონცენტრირებული და არანაირი ინტერესი არ გვექნებოდა და გულწრფელად არც არანაირი სტიმული, რომ სამოქალაქო ინფრასტრუქტურა მიზანში ამოგვეღო. მეორე მხრივ, ირანელები სამოქალაქო ინფრასტრუქტურას მიზანში იღებენ თქვენ ეს გინახავთ დარწმუნებული ვარ. ისინი არტყამენ სასტუმროებს, საელჩოებს, აეროპორტებს, ნავთობ ინფრასტრუქტურებს," — განაცხადა რუბიომ.

თეთრი სახლის პრესმდივანმა, კეროლაინ ლევიტმა აშშ-ის მხარის მიერ სკოლის დაბომბვაზე საუბრისას განაცხადა: "რაც ჩვენ ვიცით, არა," და დასძინა, რომ "ომის დეპარტამენტი ამ საკითხს იკვლევს".

ირანის წითელმა ნახევარმთვარე საზოგადოებამ განაცხადებით, 28 თებერვლიდან აშშ-ისა და ისრაელის დარტყმებისგან ირანში 555 ადამიანი დაიღუპა , ხოლო Human Rights Activist-ის ინფორმაციით, გარდაცვლილების რაოდენობა 742-ს აღწევს, მათ შორის 176 ბავშვია.