ირანში მიმდინარე კონფლიქტის ფონზე, სომხეთმა და აზერბაიჯანმა ირანიდან, ჯამში, დაახლოებით 1 500 ევაკუირებული პირი მიიღეს. ამის შესახებ ინფორმაციას OC media ავრცელებს.

აზერბაიჯანული სამთავრობო მედიასაშუალება APA იტყობინება, რომ აზერბაიჯანმა ირანიდან 1 200-ზე ოდნავ ნაკლები ადამიანი მიიღო, რომელთა შორის მხოლოდ ოთხი იყო ირანის მოქალაქე. მიღებულთა აბსოლუტური უმრავლესობა უცხო ქვეყნის მოქალაქეა: 361 ჩინეთის, 246 რუსეთის და მინიმუმ 99 ტაჯიკეთის. გამოცემის ცნობით, ევაკუირებულთაგან 224 აზერბაიჯანის მოქალაქე იყო.

ოთხშაბათს შუადღისას APA-მ ცალკე გავრცელებულ ინფორმაციაში აღნიშნა, რომ ირანთან ასტარის სახელმწიფო საზღვრის გავლით დამატებით 21 ადამიანის ევაკუაცია განხორციელდა, მათ შორის არიან ტაჯიკეთის, პაკისტანის, ჩინეთისა და საფრანგეთის მოქალაქეები. შეგახსენებთ, რომ აზერბაიჯანის სახმელეთო საზღვარი COVID-19-ის პანდემიის დაწყების შემდეგ დაკეტილია და ხელისუფლება რეგულარულად ახანგრძლივებს ამ შეზღუდვას პანდემიის მიზეზით.

მეორე მხრივ, რუსული სახელმწიფო საინფორმაციო სააგენტო Sputnik-ის ცნობით, სომხეთმა ორშაბათიდან სამშაბათამდე პერიოდში ირანიდან 400 ევაკუირებული პირი მიიღო, რომელთა შორის 300 ირანელი იყო.