მთავრობის ადმინისტრაციის ცნობით, ნახიჩევანის ავტონომიურ რესპუბლიკაში დრონებით განხორციელებულ შეტევასთან დაკავშირებით, ირაკლი კობახიძე ილჰამ ალიევს ტელეფონით ესაუბრა. მან სოლიდარობა გამოხატა დაშავებულების მიმართ და დაშავებულებს მალე გამოჯანმრთელება უსურვა.

"ნახიჩევანის ავტონომიურ რესპუბლიკაში დრონებით განხორციელებულ შეტევასთან დაკავშირებით სატელეფონო საუბარი მქონდა აზერბაიჯანის პრეზიდენტ ილჰამ ალიევთან. გამოვთქვი საქართველოს სოლიდარობა და დაშავებულებს მალე გამოჯანმრთელება ვუსურვე. ჩვენ დავადასტურეთ ჩვენს ქვეყნებს შორის არსებული ძლიერი პარტნიორობა და ხაზი გავუსვით რეგიონში მშვიდობისა და სტაბილურობის მნიშვნელობას", — წერს ირაკლი კობახიძე X-ზე.

ცნობისათვის, აზერბაიჯანში, ნახიჩევანის აეროპორტის ტერიტორიაზე ირანის უპილოტო საფრენი აპარატები გუშინ ჩამოვარდა. აზერბაიჯანული პროსამთავრობო სააგენტო APA News Agency-ს ცნობით, თავდასხმის შედეგად 2 ადამიანი დაშავდა. ერთი დრონი ნახიჩევანის აეროპორტის ტერიტორიაზე ჩამოვარდა, მეორე — სკოლის შენობასთან ახლოს.

ირანის საგარეო საქმეთა მინისტრის მოადგილემ, კიზიმ გარიბაბადიმ AnewZ-ის ეთერში საუბრისას განაცხადა, რომ "ირანი არ ესხმის თავს მეზობელ ქვეყნებს, გარდა იმ შემთხვევისა, თუ ამ ქვეყნის ტერიტორიაზე არიან აქტიურები ჩვენი მოწინააღმდეგეები".

აზერბაიჯანის პრეზიდენტმა, ილჰამ ალიევმა უშიშროების საბჭოს სხდომაზე ნახიჩევანის აეროპორტის ტერიტორიაზე უპილოტო დრონების ჩამოგდების ფაქტზე საუბრისას განაცხადა, რომ "ტერორისტული აქტის ჩამდენებს სისხლის სამართლის პასუხისმგებლობა უნდა დაეკისროთ".