მსოფლიოში ერთ-ერთმა უძველესმა გაზეთმა 320-წლიანი ისტორიის შემდეგ ბეჭდური ვერსიის გამოცემა შეწყვიტა. ავსტრიული გამოცემა Wiener Zeitung ამიერიდან მხოლოდ ინტერნეტში განაგრძობს საქმიანობას.

გაზეთის ხელმძღვანელობამ ბეჭდური გამოცემის დახურვის გადაწყვეტილება მას შემდეგ მიიღო, რაც ქვეყნის მთავრობამ საკანონმდებლო ცვლილება დაამტკიცა. ცვლილების მიხედვით, კომპანიები ვალდებულები აღარ იქნებიან, ფინანსურ საქმიანობასთან დაკავშირებული ინფორმაცია გაზეთის ბეჭდურ გამოცემაში განათავსონ. რადგან ეს Wiener Zeitung-ისთვის შემოსავლის ძირითადი წყარო იყო, გაზეთმა ბეჭდური გამოცემა დახურა და თანამშრომლების ორი მესამედი სამსახურიდან დაითხოვა.

Wiener Zeitung სამთავრობო გაზეთი იყო, თუმცა, დამოუკიდებელი სარედაქციო პოლიტიკით ხელმძღვანელობდა. გაზეთმა გამოცემა 1703 წლის აგვისტოში დაიწყო და მას შემდეგ სახელიც არაერთხელ გამოიცვალა.

"320 წელი, 12 პრეზიდენტი, 10 იმპერატორი, 2 რესპუბლიკა, 1 გაზეთი", — ასეთი წარწერა ამშვენებდა Wiener Zeitung-ის უკანასკნელი ნომრის თავფურცელს.

აღსანიშნავია, რომ ამ გაზეთში დაიბეჭდა ადამიანის უფლებათა დეკლარაცია. აქვე იტყობინებოდნენ 1768 წელს "გამორჩეული ნიჭის" მქონე 12 წლის მოზარდზე — ვოლფგანგ ამადეუს მოცარტზე.

სამსაუკუნოვანი ისტორიის განმავლობაში, Wiener Zeitung-მა გამოცემა მხოლოდ ერთხელ შეაჩერა — მას შემდეგ, რაც ნაცისტური გერმანია ავსტრიაში შეიჭრა და ქვეყნის ანექსია მოახდინა.

ამდენი დაბრკოლების გადალახვის შემდეგ გაზეთის დახურვა ახლა უჩვეულო უნდა იყოს, მაგრამ თავად გამოცემა ბოლო ნომერში სხვა მიზეზებსაც ხსნის:

"ხარისხიანი ჟურნალისტიკისთვის ახლა რთული დროა. უფრო და უფრო მეტ პლატფორმებს იკავებს ყალბი ინფორმაცია, კატების ვიდეოები და შეთქმულების თეორიები".