ამის შესახებ ზუგდიდის სოფელ ონარიის საჯარო სკოლის მასწავლებელი, მანანა მიქავა ფორმულასთან საუბრობს.

რატომ არის მნიშვნელოვანი: განათლების სამინისტროს ინფორმაციით, დირექტორობის მსურველთა სერტიფიცირების პროცესი წარმატებით აპლიკანტების 76%-მა გაიარა.

  • გასაუბრების ეტაპზე დირექტორობის 755 კანდიდატი გადავიდა.
  • მიქავა კონკურსიდან მისი კანდიდატურის ჩახსნის პოლიტიკურ მოტივებზე საუბრობს.

დეტალები: მასწავლებლის განცხადებით, 2024 საარჩევნო წელია და ხელისუფლებაში, როგორც ჩანს, არ სურთ, მიიღონ ახალი ნაკადი, რომელსაც კრიტიკული დამოკიდებულება ექნება მათ მიმართ.

  • "ჩემი აზრით, ეს არის ერთადერთი მიზეზი, რის გამოც გაიფილტრა კანდიდატები".
  • როგორც მიქავა ამბობს, მერიის წარმომადგენელმა დაუფარავად უთხრა, რომ სიები მათთან მიდის და მერია აწერს ხელს, თუ ვინ უნდა გადავიდეს შემდეგ ეტაპზე.
  • "განათლების სამინისტროს არ აქვს იმის ძალა და უფლება, რომ თავის იურისდიქციაში მყოფი მასწავლებლები თვითონ დანიშნოს თანამდებობაზე".

ISFED-ში განმარტავენ, რომ სკოლების საკითხს 2020 წლიდან სწავლობენ და აკვირდებიან, ხომ არ ხდება დირექტორების თუ პედაგოგების იძულებით ჩართულობა საარჩევნო პროცესებში.

  • ორგანიზაციის აღმასრულებელი დირექტორი, ნინო დოლიძე ამბობს, რომ ჯერ კიდევ 2020 წელს გამოცხადებული გამოცდები არ ჩატარდა, სკოლის თანამშრომლები კი პოლიტიკური ნიშნით დანიშვებზე საუბრობდნენ.
  • "მაშინ სკოლის დირექტორების დიდი ნაწილი თავიდან დანიშნეს თუმცა ნაწილი აღარ დანიშნეს მოვალეობის შემსრულებლად და ეს ადამიანები საუბრობდნენ, რომ პოლიტიკური ნიშნით არ დანიშნეს";
  • "რამდენიმე მათგანის უფლებასაც ვიცავთ და ისინი ამბობდნენ, რომ იმიტომ, რომ პოლიტიკურად არ ვიაქტიურეთ, ან შესაძლოა, ნათესავი ან ოჯახის წევრი იყო დაკავშირებული ოპოზიციურ პარტიასთან, ამიტომ არ დავისინჯეთო".
  • On.ge დეტალებზე განათლების სამინისტროს დაუკავშირდა. უწყებაში ამბობენ, რომ ინფორმირებულები არიან, თუმცა კომენტარს ჯერჯერობით არ აკეთებენ.