ინფორმაცია თავდაპირველად ფოტოს ავტორმა, ზურა ცერცვაძემ გაავრცელა.

რატომ არის მნიშვნელოვანი: ფოტო რუსული კანონის საწინააღმდეგო აქციაზე გადაღებული. მასზე ჩანს პოლიციის წყლის ჭავლის წინ მდგომი ქალი (ნანა მალაშხია) რომელიც ევროკავშირის დროშას აფრიალებს.

  • ფოტო არაერთი საერთაშორისო მედიასაშუალებამ, მათ შორის, POLITICO-მ, Bloomberg-მა, The New York Times-მა გამოაქვეყნეს.
  • ცერცვაძის თქმით, კონკურსს ნატოსა და ევროკავშირის შესახებ საინფორმაციო ცენტრი ატარებდა.
  • "ვიფიქრე, გავგზავნი... დღეს მომწერეს, კონკურსიდან ჩაგხსენით, ფოტომ ჩვენი კრიტერიუმები ვერ დააკმაყოფილაო", — წერს ფოტოგრაფი.
  • როგორც ცერცვაძე ფორმულასთან ამბობს, ფიქრობს, რომ ამ გადაწყვეტილებას პოლიტიკური ქვეტექსტი ჰქონდა.

დეტალები: საინფორმაციო ცენტრის ფეისბუქგვერდზე გამოქვეყნებული ინფორმაციით, ფოტოკონკურსის სახელად, მე ვხედავ ევროპას, შესარჩევი ეტაპი დასრულდა და 167 ფოტოდან 13 აარჩიეს, რომელიც საკონკურსო ალბობშია განთავსებული.

  • კრიტერიუმებს შორისაა, ფოტოს თემატურობა, ტექნიკური მახასიათებლები, ვიზუალური და ესთეტიკური მიმზიდველობა და ზოგადი მახასიათებლები, როგორიცაა, სტილი, კონტექსტი და კრეატიულობა.

საინფორმაციო ცენტრი სამთავრობო ორგანიზაციაა. ცენტრის დირექტორი თამარ წულეისკირია, მისი ქმარი კი ქართული ოცნების დეპუტატი, ლევან კობიაშვილი.

  • კობიაშვილი ერთ-ერთია იმ დეპუტატებს შორის, რომელმაც რუსულ კანონს მხარი დაუჭირა, რასაც საზოგადოების კრიტიკა მოჰყვა.
  • წულეისკირი ქმარს ფეისბუქგვერდზე გამოექომაგა და ითხოვდა, რომ friend-ებიდან წაეშალათ მათ, ვისაც მისი ქმარი მოღალატე ჰგონია.
  • On.ge იმის გასარკვევად, თუ რა კრიტერიუმი ვერ დააკმაყოფილა ცერცვაძის ფოტომ, ცენტრთან დაკავშირებას ცდილობს. მათ პასუხს მიღებისთანავე შემოგთავაზებთ.