პარლამენტის თავმჯდომარის შემდეგ, რუსთაველის პროტესტის მონაწილეებს "სექტა" მთავრობის მეთაურმაც უწოდა.

კობახიძე ამბობს, რომ მისთვის ყველაზე მძიმე ისაა, რომ Kordz-ის კონცერტს ევროკავშირი და დანიის კულტურის ცენტრი აფინანსებდნენ. მისი შეფასებით, ღონისძიება "ფაშიზმის წამახალისებელი" და პოლიტიკური აქტი იყო, ხოლო ევროპული ბიუროკრატია ამ შემთხვევაში "საბჭოური მეთოდებით" მოქმედებდა

"მართლა ერთგვარი სექტის სახე მიიღო იმ დაჯგუფებამ, რომელიც ყოველდღიურ რეჟიმში თუნდაც ხან 20, ხან 50, ხან მაქსიმუმ 150 კაცით აწყობს ხოლმე აქციებს და თავად ხედავენ, რომ წარუმატებლობისთვის არის მათი ეს აქციები განწირული. თუმცა მათი ერთგვარი თვითმიზანია, რომ ყოველდღიურად შეიკრიბონ, რათა ამ ყველაფერს დაარქვან უწყვეტი პროტესტი. პირიქით, ამ ქმედებებით ხდება მათი ე.წ. პროტესტის დისკრედიტაცია. როდესაც გამოდიხარ ყოველდღე და ყოველდღე აჩვენებ საზოგადოებას იმას, რომ ხარ ცოტა, ეს ბუნებრივია არავითარ ლოგიკაში არ ჯდება გარდა ერთისა - მათ აქვთ მიღებული დავალება და მათი დავალება პირველ რიგში სწორედ სექტის ფორმით მოქმედებაა. ეს მათი სამწუხარო არჩევანია, ეს არის მათი ტრაგიკული არჩევანი. საზოგადოება ხედავს ყველაფერს და სწორედ ამის გამოა, რომ საზოგადოების უდიდესი უმრავლესობა მხარს უჭერს არა ე.წ. პროტესტს, არამედ ხელისუფლების მიერ გაცხადებულ და განხორციელებულ კურსს", — თქვა კობახიძემ.

შეგახსენებთ, რომ პარლამენტის თავმჯდომარემ, შალვა პაპუაშვილმა, 24 სექტემბერს გამოქვეყნებულ პოსტში ოპოზიციის მიერ 2024 წლის საპარლამენტო არჩევნების შემდეგ დაწყებული "უწყვეტი პროტესტის" მიმდინარეობა ვრცლად მიმოიხილა და დაწერა, რომ რუსთაველის პროტესტის მონაწილეები „ფსევდორელიგიურ ფუნდამენტალისტურ სექტად“ ჩამოყალიბდნენ.

პაპუაშვილმა რუსთაველის პროტესტის მონაწილეებს "ფსევდორელიგიური სექტა" კიდევ ერთხელ უწოდა