ირაკლი კობახიძემ გორში დაგეგმილ "კამარა ფესტივალზე Kordz-ის კონცერტის გაუქმებას გამოეხმაურა. მისი თქმით, ყველაზე მძიმე ისაა, რომ კონკრეტულ კონცერტს ევროკავშირი და დანიის კულტურის ცენტრი აფინანსებდნენ, რაც, მისი შეფასებით, "ფაშიზმის წამახალისებელი აქტია". მისივე განცხადებით, ევროპული ბიუროკრატია ამ შემთხვევაში "საბჭოური მეთოდებით" მოქმედებდა და იმედი გამოთქვა, რომ მომავალში ეს მიდგომები შეიცვლება.

"ყველაზე მძიმე ამ ყველაფერში არის ის, რომ კონკრეტულ კონცერტს, ღონისძიებას აფინანსებდა ევროკავშირი და დანიის კულტურის ცენტრი. როდესაც კულტურის ცენტრი უკულტურობას აფინანსებს და უკულტურობის მიღმა აფინანსებს ფაშიზმს, ეს არის, რა თქმა უნდა, აბსოლუტურად წარმოუდგენელი მოვლენა

ზუსტად ეს არის ის მეთოდები, რაზეც ქალბატონი გიგაური საუბრობდა — საბჭოური მეთოდები. ასეთი საბჭოური მეთოდებით ახლა მოქმედებს ევროპული ბიუროკრატია, რაც მართლა გამაოგნებელია, წარმოუდგენელია, როდესაც ფაშიზმის წამახალისებელ ადამიანს უორგანიზებ კონცერტს. ეს, რა თქმა უნდა, პოლიტიკური აქტია და ეს არის ნამდვილად ფაშიზმის წამახალისებელი, ლიბერალური ფაშიზმის წამახალისებელი აქტი, რაც ტრაგიკული მოვლენაა. მე იმედი მაქვს, რომ სხვაგვარად წარიმართება პროცესები ევროპულ ბიუროკრატიაში და მომდევნო წლების განმავლობაში მთლიანად შეიცვლის თავის მეთოდებს, საბჭოურ მეთოდებს, ევროპული ბიუროკრატია", — თქვა კობახიძემ.

შეგახსენებთ, რომ კონცერტი დანიის კულტურის ინსტიტუტმა, რომელიც „კამარა ფესტივალის“ ორგანიზატორი იყო, გააუქმა/გადადო. მიზეზად უსაფრთხოების მიზნები დაასახელა. ამას წინ უძღოდა Kordz-ისა და ფესტივალის წინააღმდეგ სახელისუფლებო კამპანია და, თავად მუსიკოსის თქმით, ადგილობრივი ხელისუფლებისა და „ოცნების“ წევრების მხრიდან მუქარა.