ლუქსემბურგში ვიზიტით მყოფი პარლამენტის თავმჯდომარე შალვა პაპუაშვილი აცხადებს, რომ ევროკავშირმა უნდა გადახედოს საქართველოსთან ინტეგრაციის შეჩერების "მცდარ გადაწყვეტილებას".

"ვისაუბრეთ ჩვენს ორმხრივ ურთიერთობებზე, მათ შორის საპარლამენტო ურთიერთობებზე და ბუნებრივია, ამ კონტექსტში ვისაუბრეთ ასევე ევროკავშირთან ურთიერთობებზე. ჩვენ, ისევე როგორც ბელგიაში, აქაც კიდევ ერთხელ ავაჟღერეთ ჩვენი წუხილი ევროკავშირის მიერ 2024 წლის ივნისში მიღებულ გადაწყვეტილებაზე, რომ ცალმხრივად შეეჩერებინა ინტეგრაციის პროცესი. ეს არ იყო სწორი, დასაბუთებული და სამართლიანი გადაწყვეტილება. მეტიც, თავის დროზე ამ გადაწყვეტილების მიზანი, ვფიქრობ, რომ იყო საქართველოს არჩევნებში ჩარევა და გავლენის მოხდენა.

თუმცა, ვფიქრობ, დადგა მომენტი, როდესაც ევროკავშირმა უნდა გადახედოს თავის ამ მცდარ გადაწყვეტილებას, ვინაიდან ფაქტია — და მე მგონი სწორედ ეს არის ევროპულობა — რომ შეუძლებელია კონფრონტაცია იყოს სწორი გზა. ევროკავშირი დგას დიალოგზე, ევროკავშირი დგას სამართლიანობაზე და დისკუსიაზე. და როდესაც დღეს მისი ზოგიერთი ხელმძღვანელი ცდილობს, რომ ევროკავშირი კონფრონტაციის და ინტეგრაციის პროცესი კონფრონტაციის ინსტრუმენტად აქციოს, ეს არ არის სწორი", — განაცხადა პაპუაშვილმა.

შეგახსენებთ, 2024 წლის 28 ნოემბერს ირაკლი კობახიძემ ბრიფინგზე განაცხადა, რომ საქართველო 2028 წლის ბოლომდე დღის წესრიგში არ დააყენებს ევროკავშირში გასაწევრიანებლად მოლაპარაკების გახსნის საკითხს.