24 სექტემბერს, 17:00 საათზე, თბილისის გოეთეს ინსტიტუტში თბილისის მე-11 საერთაშორისო ლიტერატურული ფესტივალი გაიხსნება. წლევანდელი ღონისძიება, რომელსაც "პენ საქართველო" აორგანიზებს, მთავარი თემის — "მეხსიერება, როგორც წინააღმდეგობა" ფარგლებში გაიმართება.

ოთხი დღის განმავლობაში, 24-27 სექტემბერს, თბილისი მსოფლიოს 10 ქვეყნიდან ჩამოსულ 12 ავტორს უმასპინძლებს. ფესტივალის ფარგლებში დაგეგმილია დისკუსიები ავტორიტარიზმზე, კოლექტიურ მეხსიერებაზე, ლიტერატურის როლზე, დოკუმენტურ პროზასა და ქალთა ხმებზე ქართულ პოეზიაში.

როგორც ფესტივალის ორგანიზატორები აღნიშნავენ, მეხსიერება მხოლოდ წარსულის ხსოვნა არ არის, არამედ ის დიდწილად განსაზღვრავს აწმყოსა და მომავლის ხედვას, ავტორიტარული რეჟიმები კი სწორედ ადამიანებისა და ისტორიების წაშლას ცდილობენ.

ღონისძიებაზე რეჟისორ ნუცა ალექსი-მესხიშვილის მოკლემეტრაჟიან ფილმს აჩვენებენ, რომელიც პოეტ ზვიად რატიანს ეძღვნება. ტრადიციისამებრ, ფესტივალზე "ცარიელი სკამი" ზვიად რატიანისთვის იქნება განკუთვნილი, რაც სოლიდარობის გამოხატულებაა და ცენზურისა და ძალადობის წინააღმდეგ მიმართული სიმბოლოა.


ფესტივალის მონაწილე ავტორები არიან: დიმიტრის დიმიტრიადისი (საბერძნეთი), ადამ ზამოისკი (პოლონეთი/დიდი ბრიტანეთი), დანიელ ვისერი (ავსტრია), ულრიკე ალმუტ ზანდიგი (გერმანია), ოლენა ჰერასიმიუკი (უკრაინა), მარკ ნოვაკი (აშშ), ელიზა კონცკა (პოლონეთი), ლუკა ბრუნონი (შვეიცარია), მარტონ შიმონი (უნგრეთი), ლუსინე ხარატიანი (სომხეთი), პშემისლავ სუხანეცკი (პოლონეთი) და კრიპა (ინდოეთი).


მნიშვნელოვანი დისკუსიები

"ავტორიტარიზმი და კოლექტიური მეხსიერება" — მონაწილეობენ ადამ ზამოისკი და დიმიტრის დიმიტრიადისი (უძღვება სალომე პატარიძე).

"როგორ ინახავს ლიტერატურა მეხსიერებას?" — მონაწილეობენ მარკ ნოვაკი და ოლენა ჰერასიმიუკი (უძღვება ეკა ქევანიშვილი).

გაეროს ქალთა ორგანიზაციასთან (UN Women) თანამშრომლობით, ფესტივალი მიძღვნილი იქნება მე-19 და მე-20 საუკუნეების მიჯნაზე მოღვაწე ფემინისტ მწერალი ქალების ლიტერატურული მემკვიდრეობის ხელახლა გაცოცხლებისა და დაკარგული ხმების დაბრუნებისთვის.

ფესტივალი 27 სექტემბერს დაიხურება. დასკვნით ღონისძიებაზე სტუმრები შეხვდებიან დიმიტრის დიმიტრიადისს, ასევე აჩვენებენ მიშა ჩარკვიანის სპექტაკლის "ვკვდები, როგორც ქვეყანა" ჩანაწერი.

თბილისის საერთაშორისო ლიტერატურული ფესტივალი 2015 წელს დაარსდა და 10 წლის განმავლობაში მან 50-მდე ქვეყნიდან 200-ზე მეტ ავტორს უმასპინძლა. წლევანდელი ფესტივალის წარმდგენია საქართველოს გოეთეს ინსტიტუტი, ხოლო პარტნიორები და მხარდამჭერები არიან სხვადასხვა ადგილობრივი და საერთაშორისო ორგანიზაცია, საელჩო თუ ფონდი.