ოფიციალურმა მოსკოვმა და ოკუპირებული აფხაზეთის საგარეო საქმეთა მინისტრმა, ოლეგ ბარციცმა რუსეთში მცხოვრები აფხაზი სტუდენტების სამხედრო აღრიცხვასთან დაკავშირებული საკითხები განიხილეს. ინფორმაციას OC Media ავრცელებს.

ე.წ. პრეზიდენტმა ბადრა გუნბამ განაცხადა, რომ საგარეო უწყება მისი დავალებით მუშაობს იმის უზრუნველსაყოფად, რომ რუსეთში მყოფ აფხაზ სტუდენტებს ოკუპირებულიი აფხაზეთის ნაცვლად სამხედრო აღრიცხვაზე რუსეთში არ არეგისტრირებდნენ.

ეს განცხადება ვრცელდება რუსული დამოუკიდებელი მედიის იმ ცნობების ფონზე, რომ მოსკოვი მობილიზაციის ახალი ტალღის მოსაწყობად ემზადება. სააგენტო Bloomberg-მა გაავრცელა ინფორმაცია, რომ რუსეთის მაღალი თანამდებობის პირები ცდილობენ უცხოური საბანკო ანგარიშების გახსნას და აქტივების საზღვარგარეთ გადატანას, რასაც სამხედრო კომისარიატების თანამშრომლებიც აკეთებენ. გამოცემის ცნობით, მათ აქვთ მტკიცებულებებიც, რომ საომარი უწყებების თანამშრომლები ახლობლებსა და მეგობრებს რუსეთის დატოვებას ურჩევენ. მოსკოვი ამ ბრალდებებს უარყოფს.

2025 წელს ძალაში შესული შეთანხმების თანახმად, პირები, რომლებსაც რუსეთისა და ოკუპირებული აფხაზეთის ორმაგი მოქალაქეობა აქვთ, სავალდებულო სამხედრო სამსახურს იმ ტერიტორიაზე გადიან, სადაც მუდმივად ცხოვრობენ. ამის საფუძველზე, რუსეთში მყოფი აფხაზი სტუდენტები შესაძლოა უკრაინაში რუსეთის ფართომასშტაბიან ომში გამოიძახონ. ისინი, ვინც უკვე მოიხადეს სავალდებულო სამხედრო სამსახური ე.წ. აფხაზეთში, გათავისუფლებულნი არიან.

ადრე, რუსული კანონმდებლობით, ყველა, ვისაც რუსული პასპორტი ჰქონდა (მიუხედავად იმისა, ჰქონდა თუ არა ე.წ. აფხაზური პასპორტიც), განიხილებოდა მხოლოდ რუსეთის მოქალაქედ — რაც იმას ნიშნავდა, რომ რუსული უნივერსიტეტების სტუდენტები სავალდებულო სამხედრო აღრიცხვაზე დგებოდნენ.