ჰარვი ვაინშტაინს სექსუალური დანაშაულებისთვის 15 წლით თავისუფლების აღკვეთა მიესაჯა. 74 წლის ვაინშტაინი ყოფილ ასისტენტზე, მირიამ ჰეილიზე სექსუალურ ძალადობაში გასულ წელს ცნეს დამნაშავედ. პროკურატურა ვაინშტაინის 20-წლიან პატიმრობას ითხოვდა, ხოლო დაცვის მხარე — 9-წლიანს.

ვაინშტაინი სექსუალურ დანაშაულებში პირველად 2020 წელს ცნეს დამნაშავედ და 23 წლით თავისუფლების აღკვეთა მიუსაჯეს. თუმცა, ოთხი წლის შემდეგ, სააპელაციო სასამართლომ განაჩენი გააუქმა და საქმის ხელახლა განხილვის ბრძანება გაიცა.

გასულ წელს გამართულ მეორე სასამართლო პროცესზე ერთ ბრალდებაში ის კვლავ ცნეს დამნაშავედ. თუმცა, მეორე ბრალდებაზე ვერდიქტის გამოტანა ვერ შეძლეს, მესამე მუხლში კი ვაინშტაინი გამართლდა. ამის შემდეგ, მოსამართლემ ისევ ხელახალი სასამართლო პროცესი ჩანიშნა.

ფოტო: CNN

2026 წლის დასაწყისში, მესამე სასამართლო პროცესზე, ნაფიცი მსაჯულები კვლავ ვერ შეთანხმდნენ ვერდიქტზე. პროკურორის, ოლვინ ბრეგის, ოფისმა ვაინშტაინის დარჩენილი ბრალდებების მოხსნაზე განაცხადი შეიტანა და აღნიშნა, რომ საქმის ხელახალ განხილვას აღარ მოითხოვდა.

ვაინშტაინმა თავი არცერთ ბრალდებაში არ ცნო დამნაშავედ, ხოლო მისი ადვოკატები ამტკიცებდნენ, რომ მიუხედავად ამ ქალებთან ურთიერთობისა, ჰარვის მათზე არ უძალადია.

ვაინშტაინის წინააღმდეგ ძალადობის შესახებ ბრალდებები პირველად 2017 წელს დაიწყო და დასაბამი მისცა #MeToo მოძრაობას. ამ ყველაფერმა ჰარვის კინო და ტელეინდუსტრიაში არსებული გავლენიანი პოზიციები მალევე ჩამოართვა.