რუსეთმა, ოკუპირებულმა ცხინვალმა და აფხაზეთმა საქართველოსგან ძალის გამოუყენებლობის შესახებ სამართლებრივი გარანტიები მოითხოვეს. ამის შესახებ ნათქვამია რუსეთის საგარეო საქმეთა მინისტრის მოადგილის, მიხაილ გალუზინის, ოკუპირებული აფხაზეთის ე.წ. საგარეო საქმეთა მინისტრის, ოლეგ ბარციცისა და ოკუპირებული სამხრეთ ოსეთის ე.წ. სახელმწიფო მრჩევლის, კონსტანტინ კოჩიევის ერთობლივ განცხადებაში.

"მყარი უსაფრთხოების უზრუნველყოფა შეუძლებელია თბილისიდან ორი ახალგაზრდა რესპუბლიკის წინააღმდეგ ძალის გამოუყენებლობის შესახებ იურიდიულად სავალდებულო გარანტიების შემუშავების, ასევე ქართულ-აფხაზური და ქართულ-ოსური სახელმწიფო საზღვრების დელიმიტაციისა და შემდგომი დემარკაციის გარეშე", — ნათქვამია განცხადებაში.

მხარეებმა ასევე განიხილეს სამხრეთ კავკასიის ქვეყნებში განვითარებული მოვლენები და რეგიონში უსაფრთხოების საკითხები.

მანამდე რუსეთის პრეზიდენტი ვლადიმირ პუტინი ოკუპირებული სამხრეთ ოსეთის ე.წ. პრეზიდენტს, მარატ კამბოლოვს, ტელეფონით ესაუბრა. რუსეთის ლიდერმა მას ე.წ. არჩევნებში დამაჯერებელი გამარჯვება მიულოცა.