ქვეყნის ევროპული არჩევანი კონსტიტუციაშიც განმტკიცებულია და არაერთი საერთაშორისო და გავლენიანი ორგანიზაციის კვლევითაც დასტურდება.

რატომ არის მნიშვნელოვანი: სხვების მსგავსად, NDI-ის კვლევაც აჩვენებს, რომ საქართველოს მოქალაქეები კვლავ მტკიცედ უჭერენ მხარს ევროკავშირთან ახლო პოლიტიკურ და ეკონომიკურ თანამშრომლობას.

• თუმცა, ასეთი მისწრაფებების მიუხედავად, მოსახლეობის უმრავლესობის აზრით, საქართველოს მთავრობა ქვეყნის ევროკავშირში გასაწევრიანებლად საკმარისს არ აკეთებს.
• კვლევის მიხედვით, საქართველოსა და ევროკავშირს შორის მჭიდრო პოლიტიკური თანამშრომლობის სურვილი მნიშვნელოვნად გაიზარდა.

• უმრავლესობას რუსეთთან ახლო ურთიერთობას ევროპული და ევრო-ატლანტიკური ინტეგრაცია ურჩევნია.

დეტალები: კითხვაზე, რომელ ქვეყნებთან ან გაერთიანებებთან უნდა ჰქონდეს საქართველოს ყველაზე მჭიდრო პოლიტიკური თანამშრომლობა:

• 54% ევროკავშირს პასუხობს;
• 32% — აშშ-ს;
• 14% — თურქეთს;
• 12% — რუსეთს;
• 10% — ნატოს;
• 10% — აზერბაიჯანს.

ევროკავშირის მხარდაჭერა კვლავ მაღალია — 82 %, რაც საქართველოს მოქალაქეების მხრიდან ევროკავშირში გაწევრიანების ურყევ სურვილზე მიუთითებს.

• ევროკავშირთან მჭიდრო პოლიტიკური თანამშრომლობის სურვილი განსაკუთრებით თბილისისა და სხვა ქალაქების მცხოვრებლებში და ახალგაზრდებში გაიზარდა.
• ამავდროულად, კვლევის მიხედვით, მოქალაქეების უმრავლესობას — 52%-ს, ყველაზე მჭიდრო პოლიტიკური და ეკონომიკური თანამშრომლობა ევროკავშირთან სურს.
• 35% კვლავაც ფიქრობს, რომ მთავრობა საკმარისს არ აკეთებს ან არაფერს აკეთებს იმისთვის, რომ საქართველო ევროკავშირში გაწევრიანდეს.
• მეტიც, კვლევის მიხედვით, ქართული ოცნების მხარდამჭერთა მესამედი არ არის დარწმუნებული, რომ მთავრობა ევროკავშირში გაწევრიანებისთვის ყველაფერს აკეთებს.

ნატოს მხარდაჭერა სტაბილურად მაღალია — 73%. რაც შეეხება რუსეთს, ოკუპანტ ქვეყანასთან მჭიდრო პოლიტიკურ თანამშრომლობას კაცები უფრო ემხრობიან, ვიდრე ქალები.

• კვლევა აჩვენებს, რომ სხვა ჯგუფებთან შედარებით, ქართული ოცნების მხარდამჭერები ნაკლებად ხედავენ სარგებელს ევროპულ და ევრო-ატლანტიკურ ინტეგრაციაში.

• 26% მიიჩნევს, რომ საქართველომ რუსეთთან ეკონომიკური ურთიერთობები უნდა
  შეზღუდოს;
• 30% ფიქრობს, რომ ისე დატოვოს, როგორც არის;
• 25% კი ამ ურთიერთობების გაღრმავების მომხრეა.
• ამავდროულად, კვლევის მიხედვით, ახალგაზრდები უფრო მეტად უჭერენ მხარს რუსეთთან ეკონომიკური ურთიერთობების შეზღუდვას.

კვლევა დაფინანსებულია დიდი ბრიტანეთისა და ჩრდილოეთ ირლანდიის გაერთიანებული სამეფოს მთავრობის საგარეო, თანამეგობრობისა და განვითარების ოფისის კარგი მმართველობის ფონდის მიერ.

• ჩატარებულია NDI-ის დაკვეთით CRRC საქართველოს მიერ.

მეთოდოლოგია: სატელეფონო გამოკითხვის საველე სამუშაოების 2023 წლის 17-23 მარტა ჩატარდა.

• 1032 დასრულებული ინტერვიუ (14% გამოპასუხება);
• საშუალო ცდომილების ზღვარი +/- 2% (ცდომილების ზღვარი იცვლება სხვადასხვა
  პასუხის მიხედვით)
• რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით შეირჩნენ.
• ინტერვიუები ჩატარდა ქართულ, აზერბაიჯანულ, სომხურ და რუსულ ენებზე.
• კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით).
• გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის.