რატომ არის მნიშვნელოვანი: შუალედური და რიგგარეშე არჩევნები 10 მუნიციპალიტეტში მიმდინარეობს. მოქალაქეები ირჩევენ:

• პარლამენტის ფოთი-სენაკი-ხობის მაჟორიტარ დეპუტატს;
• გურჯაანის, თიანეთის, ახალციხის, ტყიბულის, ქუთაისის საკრებულოების მაჟორიტარ დეპუტატებს;
• ცაგერისა და თერჯოლის მერებს.

ვინ (არ) მონაწილეობს არჩევნებში: ოპოზიციამ არჩევნებში ჩართვაზე უარი თქვა, ამიტომ მერების რიგგარეშე არჩევნებისათვის კანდიდატი მხოლოდ ქართულ ოცნებას ჰყავს წარდგენილი.

• საკრებულოს შუალედური არჩევნებზე მმართველი გუნდის ერთადერთი კონკურენტი საინიციატივო ჯგუფის წარმომადგენელია, პარლამენტის შუალედურ არჩევნებზე კი — კახა კუკავას პარტის წევრი.
• ფოთი-სენაკი-ხობის მაჟორიტარობის ქართული ოცნების კანდიდატი, გიორგი ხახუბია ფიქრობს, რომ სხვა ოპოზიციურმა პარტიებმა მას კონკურენტი არ დაუყენეს, რადგან "იცოდნენ წინასწარ, რა შედეგები იქნებოდა".
• ენმ-ის გენერალური მდივანი პეტრე ცისკარიშვილი განმარტავს, რომ პროცესის მიმართ ნდობა არ არსებობს, ამიტომ ფარსში მონაწილეობას არ იღებენ.
• "ვითარება ქვეყანაში ნორმალურთან დაახლოებულიც არ არის, გაცდენილია და მთელი ძალისხმევა პოლიტიკური დემოკრატიული ოპოზიციის, ჩვენი, ევროპული საქართველოსიც არის ადამიანების მოტივირება გადამწყვეტ არჩევნებზე, რომელიც მოდის შემდეგ წელს", — განაცხადა გიგა ბოკერიამ რუსთავი 2-თან.

ცესკოს განცხადებით, ეს პირველი არჩევნებია, როდესაც საარჩევნო ადმინისტრაცია ელექტრონულ ტექნოლოგიებს ფართო მასშტაბით იყენებს, ამიტომ, ეს არჩევნები განსაკუთრებული მნიშვნელობისაა.

• "ეს არის ერთგვარი გენერალური რეპეტიცია 2024 წლის არჩევნებისთვის", — აცხადებენ ცენტრალუ საარჩევნო კომისიაში.
• მათივე თქმით, პროცესს არაერთი ადგილობრივი და საერთაშორისო დამკვირვებელი ორგანიზაცია აკვირდება.
• ასევე, ამბობენ, რომ საარჩევნო ადმინისტრაცია სრულად არის მზად, კანონმდებლობის დაცვით, გამჭვირვალეს გაუწიოს ადმინისტრირება მას.
• ცესკოში ამომრჩევლებს მოუწოდებენ, მივიდნენ საარევნო უბნებზე, რადგან მათი აქტიურობა ძალიან მნიშვნელოვანია.

როგორ ჩატარდება არჩევნები: საარჩევნო ბიულეტენი განსხვავებულია — ცესკოს განმარტებით, ამომრჩეველმა კი არ უნდა შემოხაზოს სასურველი კანდიდატის ნომერი, უნდა გააფერადოს წრე სახელის წინ.

• აპარატი ავტომატურად ითვლის ხმებს და კენჭისყრის დასრულების შემდეგ ბეჭდავს წინასწარი შედეგების ამონაწერს.
• ცესკოში ამბობენ, რომ ელექტრონული აპარატები არ არის დაკავშირებული ინტერნეტის ქსელთან და კიბერჩარევის საფრთხე არ არსებობს.
• სიახლეა გადასატანი ყუთით სარგებლობაზეც — პირველად ამ არჩევნებზე, ის ამომრჩევლებიც გაივლიან მარკირებას, რომლებიც გადასატანი ყუთის გამოყენებით მისცემენ ხმას.

რიცხვებში: როგორც ცესკოში ბრიფინგზე გუშინ განაცხადეს, სულ 165 საარჩევნო უბანი იმოქმედებს — ათივე მუნიციპალიტეტში 185 056 ამომრჩეველია რეგისტრირებული.

• აპარატების გამოყენებით კენჭისყრა 117 საარჩევნო უბანზე ჩატარდება და მონაწილეობას ამომრჩეველთა საერთო რაოდენობის 91% მიიღებს
• რაც შეეხება დანარჩენ, 48 საარჩევნო უბანს, (მათ შორის არის პენიტენციურ დაწესებულებაში გახსნილი ერთი უბანიც) კენჭისყრა აქამდე არსებული წესით ჩატარდება, თუმცა საარჩევნო ბიულეტენები გაციფრულდება და შესაბამის პლატფორმაზე აიტვირთება.