შსს განმარტავს, რომ სტუდენტური საცხოვრებლის ტერიტორიაზე მათი თანამშრომლები გეგმურ დათვალიერებას ახორციელებდნენ.

რატომ არის მნიშვნელოვანი: თსუ-ის სტუდენტები აქტიურად აპროტესტებდნენ რუსულ კანონს, რომლის ინიციატორები და მხარდამჭერები, მათ შორის, მათი ლექტორებიც იყვნენ. მაგალითად, ირაკლი კობახიძე და ნიკოლოზ სამხარაძე.

  • მას შემდეგ, რაც ხელისუფლებას კანონის ჩაგდება მოუწია, სტუდენტურმა პროტესტმა აკადემიურ სივრცეში გადაინაცვლა და რუსული კანონის მხარდამჭერი ლექტორებისადმი ბოიკოტით გაგრძელდა.
  • 18 მარტს მაისის სტუდენტურმა მოძრაობამ გაავრცელა განცხადება, რომ ბაგების საერთო საცხოვრებელში პოლიცია შევიდა. სტუდენტები ამბობენ, რომ მთავრობა მათ დაშინებას პოლიციური რეჟიმით ცდილობს.
  • მაისის სტუდენტური მოძრაობის განცხადებით, პოლიციელებმა სტუდენტებს პირადი მონაცემები გამოართვეს და არ მიუწოდებიათ ინფორმაცია, რატომ აგროვებდნენ მათ პერსონალურ ინფორმაციას.

დეტალები: უწყების განმარტებით, 14-16 მარტს მართლწესრიგის ოფიცრები ბაგებში მდებარე სტუდქალაქში ინფორმაციის შეგროვებას, სისტემატიზაციას და პირველად დამუშავებას ახორციელებდნენ.

  • შსს აცხადებს, რომ სტუდენტური ქალაქის ტერიტორიაზე მდებარეობს ხუთი საცხოვრებელი კორპუსი, სადაც სხვადასხვა ასაკის და პროფესიის 1 500 ადამიანი სახლობს, რომელთა მხოლოდ 20% -ია სტუდენტი.
  • შსს-მ ასევე მოუწოდა საკითხით დაინტერესებულ ახალგაზრდულ მოძრაობებს, არასამთავრობო ორგანიზაციებსა თუ პოლიტიკურ პარტიებს თავი შეიკავონ გადაუმოწმებელი ინფორმაციის გავრცელებისა და პოლიციის მიზანმიმართული დისკრედიტაციისგან.