ამის შესახებ მოძრაობა განცხადებას ავრცელებს.

რატომ არის მნიშვნელოვანი: რამიშვილი კიდევ სამმა ქალმა სექსუალურ შევიწროებაში ამხილა.

• გუშინ, 20 მარტს ჟურნალისტმა მაკო ჯაბუამ Facebook გვერდზე დაწერა, რომ შალვა რამიშვილმა დაახლოებით 7-8 წლის წინ, სამსახურებრივი გასაუბრების დროს შეავიწროვა.
• მოგვიანებით, მაკო ჯაბუას პოსტს გამოეხმაურა ბათუმის დრამატული თეატრის მსახიობი ანანო იაშვილიც. მან დაწერა, რომ წლების წინ რამიშვილისგან სექსუალური შევიწროების მსხვერპლი გახდა.
• შემდეგ კი გვანცა ბუდაღაშვილი ფეისბუქგვერდზე დაწერა, რომ შემთხვევა 2018 წელს მოხდა, როცა POSTV მხოლოდ ონლაინტელევიზია იყო. მისი თქმით, რამიშვილმა თავად მისწერა და გასაუბრებაზე მივიდა.

სირცხვილია ამბობს, რომ კარგად ესმით, რამდენად რთულია საჯაროდ ამხილო მოძალადე, განსაკუთრებით პატრიარქალურ საზოგადოებაში, სადაც ქალზე ძალადობა ნორმალიზებულია, მსხვერპლის სტიგმატიზება და დადანაშაულება კი ფესვგადგმული.

• მოძრაობის თქმით, თათიას, მაკოს, გვანცასა და ანანოს სიმამაცეს კიდევ უფრო დასაფასებელს ხდის ის გარემოება, რომ მოძალადეს ზურგს ხელისუფლება უმაგრებს.
• "გვინდა გითხრათ, რომ თქვენ არ ხართ მარტო", — ნათქვამია განცხადებაში.

დეტალები: ამბობენ, რომ მოძალადის საჯარო მხილებით ეხმარებიან ყველა იმ ადამიანს, რომელიც, შესაძლოა, ამ წუთებშიც განიცდიდეს შევიწროებას და სხვადასხვა მიზეზის გამო, საჯაროდ ვერ საუბრობდეს.

• მათი თქმით, მოძალადის მხილება დაუსჯელობის ჯაჭვის გაწყვეტის წინაპირობაა.
• "მაღალი თანამდებობის პირებისა და სამართალდამცავების მხრიდან ხშირია ქალთა მიმართ ძალადობის შემთხვევები, რომელთა გამოძიებისა და დასჯის დრო აუცილებლად დადგება", — წერს სირცხვილია.
• ამბობენ, რომ მზად არიან იდგნენ დაზარალებულის გვერდით, მოძალადეების წინააღმდეგ, მათ სამუშაო კაბინეტებთან, სასამართლო პროცესებზე, ტელეეთერებში და ნებისმიერ სხვა სივრცეში, სადაც ეს საჭირო იქნება.

სექსუალური შევიწროება არის არასასურველი სექსუალური ხასიათის ქცევა, რომელიც მიზნად ისახავს ან იწვევს ღირსების შელახვას და ქმნის დამაშინებელ, მტრულ, დამამცირებელ ან შეურაცხმყოფელ გარემოს.

• კანონის მიხედვით, სექსუალური ხასიათის ქცევად მიიჩნევა სექსუალური ხასიათის ფრაზების თქმა ან/და მიმართვა, გენიტალიების ჩვენება ან/და სექსუალური ხასიათის სხვა ნებისმიერი არასიტყვიერი ფიზიკური ქცევა.

• იმ შემთხვევაში, თუ მიიჩნევთ, რომ სექსუალურად შეგავიწროვეს სამსახურში, უნდა მიმართოთ სასამართლოს ან სახალხო დამცველს, ხოლო თუ ეს მოხდა საჯარო სივრცეში — პოლიციას.

• სექსუალური შევიწროება ადმინისტრაციულ სამართალდარღვევათა კოდექსით ისჯება და არ არის სისხლის სამართლის დანაშაული.

• საზოგადოებრივ ადგილებში პირის მიმართ არასასურველი სექსუალური ხასიათის ქცევა ჯარიმდება 300 ლარით, ხოლო ადმინისტრაციული სახდელის დადებიდან 1 წლის განმავლობაში განმეორების შემთხვევაში — 500 ლარით, შესაძლებელია გამასწორებელი სამუშაოებიც ერთ თვემდე ვადით.

• იგივე ქმედება არასრულწლოვანის, ორსულის, უმწეო მდგომარეობაში მყოფის, შეზღუდული შესაძლებლობების მქონე პირის მიმართ ან არასრულწლოვანის თანდასწრებით — გამოიწვევს დაჯარიმებას 500-დან 800 ლარამდე ოდენობით.

• ერთი წლის განმავლობაში გამეორების შემთხვევაში გამოიწვევს 800-დან 1 000 ლარამდე ოდენობით ჯარიმას, ან გამასწორებელ სამუშაოებს ერთ თვემდე ვადით, ან ადმინისტრაციულ პატიმრობას 10 დღემდე ვადით.