სამშაბათს და შემდეგ ხუთშაბათს, რუსეთის თავდაცვის სამინისტრომ გამოთქვა შეშფოთება მთიანი ყარაბაღის აღმოსავლეთით მდებარე მარტუნის პროვინციაში ცეცხლის შეწყვეტის დარღვევის გამო.

ოთხშაბათს მთიანი ყარაბაღის შინაგან საქმეთა სამინისტრომ განაცხადა, რომ მარტუნის ვენახებში მომუშავე მშვიდობიანი მოქალაქეები აზერბაიჯანის ცეცხლის ქვეშ მოხვდნენ.

ასევე ოთხშაბათს, აზერბაიჯანის თავდაცვის სამინისტრომ ცეცხლის შეწყვეტის ხელშეკრულების დარღვევაში დაადანაშაულა როგორც ერევანი, ასევე სტეფანაკერტი.

მათი თქმით, სომხურმა ძალებმა აღმოსავლეთ გეღარქუნიკის პროვინციაში ცეცხლი გაუხსნეს აზერბაიჯანის პოზიციებს სომხეთ-აზერბაიჯანის საზღვრის გასწვრივ და მთიანი ყარაბაღის ძალებმა ცეცხლი გაუხსნეს პოზიციებს მთიანი ყარაბაღის აღმოსავლეთით.

რეგიონში დაძაბულობა გამწვავდა მას შემდეგ, რაც 5 მარტის შეტაკებისას დაიღუპა ხუთი ადამიანი, მას შემდეგ, რაც აზერბაიჯანის ჯარები მთიანი ყარაბაღის პოლიციის მანქანას დაუპირისპირდა.

შეტაკებისას დაიღუპა სამი პოლიციელი მთიანი ყარაბაღიდან და ორი აზერბაიჯანელი ჯარისკაცი.

ბაქომ განაცხადა, რომ მანქანას, ჩაკეტილი ლაჩინის დერეფნის გვერდის ავლით, მიმდებარე გზიდან მთიან ყარაბაღში იარაღი გადაჰქონდა და სამხედრო პერსონალი გადაჰყავდა.

ბაქოს ბრალდებებზე საპასუხოდ, სომხეთის პრემიერ-მინისტრმა ნიკოლ ფაშინიანმა მომხდარს "ტერორისტული აქტი" უწოდა და აზერბაიჯანი მთიანი ყარაბაღის სომეხი მოსახლეობის გენოციდის დაგეგმვაში დაადანაშაულა.

5 მარტის შეტაკების შემდეგ, ბაქო რუს სამშვიდობოებს სომხური კოლონებისა და შეიარაღების რეგიონში ესკორტირებაში ადანაშაულებს. ერევანმა ბრალდებები უარყო და განაცხადა, რომ მთიან ყარაბაღში სომხური ჯარები არ იმყოფებიან.

მას შემდეგ, რაც ცეცხლის შეწყვეტის დარღვევის შესახებ სომხეთი და აზერბაიჯანი ორმხრივ ბრალდებებს აყენებენ, ომის განახლების შიში გამძაფრდა. დამოუკიდებელმა აზერბაიჯანულმა მედიასაშუალებამ, Mikroskop Media-მ დაადგინა, რომ აზერბაიჯანის სახელმწიფო მედიაში დაძაბულობის გაშუქებისას ერთგვარი "მინიშნებებია" ახალ ესკალაციაზე ან სამხედრო ოპერაციაზე მთიან ყარაბაღში.

11 მარტს, აზერბაიჯანის თავდაცვის მინისტრმა, ზაქირ ჰასანოვმა სამხედროებს დაავალა "მიეღოთ პრევენციული ზომები სომხეთის მუქარის წინააღმდეგ" და განაცხადა, რომ "სომხეთის მიერ არალეგალური სამხედრო ტრანსპორტირება და ცოცხალი ძალის როტაცია" მთიან ყარაბაღში "დაუშვებელია".

ამავდროულად, გასული შეხვედრების შემდეგ, აზერბაიჯანის პრეზიდენტის ადმინისტრაციამ მთიანი ყარაბაღის სომეხი წარმომადგენლები ბაქოში შეხვედრაზე მიიწვია.

მთიანი ყარაბაღის პრეზიდენტის მრჩეველმა, დავით ბაბაიანმა განაცხადა, რომ მოწვევა არის იმის მაჩვენებელი, რომ ბაქო "არ აპირებს მოლაპარაკებას" სომხურ მოსახლეობასთან და თქვა, რომ "მოლაპარაკება შეიძლება წარიმართოს მხოლოდ თანასწორი მხარეებს შორის, საერთაშორისო შუამავლების მონაწილეობით, რომლებიც ეუთოს მინსკის ჯგუფის თანათავმჯდომარეებს არიან მინდობილნი".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.