ლევან იოსელიანმა რუსული კანონის საწინააღმდეგო აქციებთან დაკავშირებით ანგარიში წარადგინა.

რატომ არის მნიშვნელოვანი: 7-8 მარტის აქციები სპეცრაზმმა არაერთხელ დაშალა წყლის ჭავლისა და ცრემლსადენი გაზის გამოყენებით.

  • რამდენჯერმე გაზის ყუმბარები მშვიდობიანი დემონსტრანტების ფეხებთან აფეთქდა, რის გამოც ადამიანები ცუდად ხდებოდნენ.
  • სამართალდამცველებმა იძალადეს მედიის წარმომადგენლებზე და ხელი შეუშალეს ჟურნალისტურ საქმიანობაში, მიუხედავად იმისა, რომ იცოდნენ, ისინი ასრულებდნენ პროფესიულ მოვალეობას.
  • აქციის მონაწილეთა ნაწილი სიტუაციისგან გარიდებას და უსაფრთხო ადგილის პოვნას ცდილობდა, თუმცა სპეცრაზმისა და პოლიციის თანამშრომლები სათითაოდ მისდევენ დემონსტრანტებს, სცემდნენ და აკავებენ.

დეტალები: ომბუდსმენის დასკვნაში ნათქვამია, რომ აქციას ჰქონდა მშვიდობიანი ხასიათი და არ არსებობდა მისი შეწყვეტისა და მის წინააღმდეგ ძალის გამოყენების საფუძველი.

  • "რაც შეეხება აქციის მონაწილეების მხრიდან ძალადობის შემთხვევებს, მათ მიმართ უნდა გატარებულიყო ინდივიდუალური, აუცილებელი და პროპორციული ღონისძიებები. აღნიშნულის საწინააღმდეგოდ, სამართალდამცავებმა შეკრების მონაწილეების, მათ შორის, მშვიდობიანი მანიფესტანტების მიმართ სპეციალური საშუალებების გამოყენება დაიწყეს, რაც ეწინააღმდეგება უფლებაში აუცილებელი და პროპორციული ჩარევის სტანდარტს", — აცხადებს იოსელიანი.
  • მისივე შეფასებით, სამართალდამცველებმა შესაბამისად ირეაგირეს აქციის იმ მონაწილეთა მიმართ, რომლებიც პარლამენტის შენობის უკანა შესასვლელს აზიანებდნენ, თუმცა ძალის გამოყენება არალეგიტიმურად გაგრძელდა საკანონმდებლო ორგანოს წინ მდგარი შეკრების მშვიდობიანი მონაწილეების მისამართით.

სახალხო დამცველი ხაზს უსვამს, რომ აქციაზე დაშავდნენ მედიის წარმომადგენლები, "მაშინ როდესაც აქციის მიმდინარეობისას კანონმდებლობა მათ განსაკუთრებული დაცვის ქვეშ აქცევს".

  • მისივე თქმით, სამართალდამცავები იყენებდნენ მასობრივი დაკავების პრაქტიკას.
  • "გავრცელებული კადრები ცხადყოფს, რომ ცალკეულ შემთხვევებში, მსგავსი ღონისძიება არ წარმოადგენდა მიმდინარე სამართალდარღვევის აღკვეთის ზომას, შესაბამისად, ვერ პასუხობდა აუცილებლობის მოთხოვნას და უფლებაში დაუსაბუთებელი ჩარევის სახე ჰქონდა".
  • იოსელიანის განცხადებით, დაკავებულები მიუთითებდნენ დაკავების უხეშ ფორმებზე და აღენიშნებოდათ დაზიანებები.
  • "განსაკუთრებით ხაზგასასმელია ზურაბ ჯაფარიძის შემთხვევა. მისი და მოწმის განმარტებით, შსს-ს რამდენიმე წარმომადგენელი მას ფიზიკურად გაუსწორდა, სცემეს ხელებით, ფეხებითა და ხელკეტებით. აღენიშნება დაზიანებები თავისა და კისრის არეში, ასევე ხელის მტევნის არეში", — ნათქვამია ანგარიშში.
  • სახალხო დამცველი მოუწოდებს საგამოძიებო უწყებებს, ჩაატარონ ეფექტიანი გამოძიება არაპროპორციული ძალის გამოყენების, ასევე, მედიის წარმომადგენლების დაშავების ფაქტებზე.