თბილისში გამართული საპროტესტო აქციები საერთაშორისო მედიის ყურადღების ცენტრში მოექცა.

რატომ არის მნიშვნელოვანი: მოქალაქეები 7 მარტის შემდეგ აპროტესტებენ ქართული ოცნებისგან ფორმალურად გამიჯნული დეპუტატების ინიციირებულ რუსულ კანონს, რომელიც საქართველოში მედიისა და არასამთავრობო სექტორის დისკრედიტაციისკენ არის მიმართული.

  • მასიური საპროტესტო აქციების ფონზე, ქართულმა ოცნებამ განაცხადა რომ კანონპროექტს გაიწვევს, თუმცა ეს დაპირება საზოგადოებაში ეჭვს ბადებს, რადგან მოქმედ ხელისუფლებას საჯაროდ დადებული პირობები პირწმინდად ხშირად არ შეუსრულებია.

დეტალები: BBC-ის შეფასებით, მმართველმა პარტიამ საკანონო კანონპროექტი მასობრივი პროტესტისა და საერთაშორისო კრიტიკის ფონზე გაიწვია.

  • "საქართველომ ევროკავშირის კანდიდატის სტატუსის მისაღებად განაცხადი შეიტანა და ნატოში გაწევრიანება მოითხოვა. ევროკავშირის ოფიციალურმა წარმომადგენლებმა დაგმეს კანონპროექტი, როგორც შეუთავსებელი ევროკავშირის ღირებულებებთან", — წერს გამოცემა.
  • Reuters-ის წერს, რომ 3,7 მილიონი ადამიანისგან შემდგარ შავი ზღვის პირა ქვეყანას 1991 წლის შემდეგ ბევრი პოლიტიკური აჯანყება უნახავს. მედიის შეფასებით, კანონპროექტმა ქართულ ოცნებას და პროევროპულ პრეზიდენტს შორის უთანხმოება გააღრმავა.
  • "ქვეყანა, რომელმაც საბჭოთა კავშირისგან დამოუკიდებლობა 1991 წელს მოიპოვა, დიდი ხანია ცდილობს ბალანსირებულად იმოქმედოს თავისი მოქალაქეების პროევროპულ განწყობებსა და მისი ძლიერი მეზობლის, რუსეთის გეოპოლიტიკურ მიზნებს შორის", — წერს CNN.
  • "მთავრობის შემობრუნება მას შემდეგ მოხდა, რაც ათასობით ქართველი ქვეყნის დედაქალაქის, თბილისის ქუჩებში ორდღიანი საპროტესტო აქციით გამოვიდა, ევროკავშირის დროშები აფრიალა და წყლის ჭავლითა და ცრემლსადენი გაზით შეიარაღებულ სპეცრაზმს პირისპირ დაუდგა", — ვკითხულობთ Politico-ს სტატიაში.

  • "2012 წლიდან პარტია ქართული ოცნება მმართველი პარტაა საქართველოში. პარტიის დამფუძნებელი, ექსცენტრიული, რუსეთთან დაკავშირებული მილიარდერი ბიძინა ივანიშვილი, გავრცელებული აზრით, მასზე კონტროლს ახორციელებს", — წერს The Guardian და დასძენს, რომ კრიტიკოსების შეფასებით, ივანიშვილი ქვეყანას რუსული ორბიტისკენ უბიძგებს.