ასოციაცია ამის შესახებ სოციალურ ქსელში განცხადებას ავრცელებს.

რატომ არის მნიშვნელოვანი: მედიკამენტებზე რეფერენტული ფასები 15 თებერვლიდან ამოქმედდა, ფარმაცევტული კომპანიები მედიკამენტების განსაზღვრულზე მეტ ფასად ვეღარ გაყიდიან.

• ცვლილება შეეხო ყველა კომპანიას, იმპორტიორს, დისტრიბუტორს თუ საცალო მოვაჭრეს.
• ჯანდაცვამ გუშინ განაცხადა, რომ ცალკეულმა კომპანიებმა თურქეთიდან შემოსულ წამლებზე ფასები ხელოვნურად გაზარდეს.
• განმარტეს, რომ ფასები კომპანიების ნაწილმა ევროპის სხვადასხვა ქვეყნიდან იმპორტირებულ, იგივე დასახელების მედიკამენტების ღირებულებას გაუთანაბრეს.

ფარმაცევტული კომპანიების ასოციაცია: ამბობენ, რომ ჯანდაცვის მხრიდან მსგავსი განცხადების გავრცელება რეფერენტული ფასის რეგულირების ამოქმედებიდან რამდენიმე დღეში ყოვლად დაუშვებელია.

• "მით უმეტეს, როდესაც მიმდინარეობას ბაზრის ადაპტაცია ცვლილებებზე და არ დარღვეულა კანონით განსაზღვრული ზღვარი. სექტორისთვის მიუღებელია მსგავსი ბრალდების რეჟიმში ყოფნა, როცა შესაბამისი მიზეზი ნამდვილად არაა", — წერია განცხადებაში.
• ამბობენ, რომ ყველა კომპანია იცავს ვალდებულებას და კანონით განსაზღვრულ დროში უზრუნველყოფს რეფერენტული ფასების კანონთან შესაბამისობაში მოყვანას.
• მათი თქმით, სამინისტროს პოზიცია გაუგებარია, რატომ შეიძლება ჩაითვალოს კანონით დადგენილი ვალდებულებების დადგენილ დროში შესრულება არაკეთილსინდისიერ ქმედებად.
• განმარტავენ, რომ კანონით განსაზღვრულია გარდამავალი პერიოდი 15 მარტამდე, რათა კომპანიებს ჰქონდეთ სხვადასხვა საკითხების დაზუსტების და ხარვეზების აღმოფხვრის შესაძლებლობა.
• მათი თქმით, თურქული მედიკამენტების იმპორტთან დაკავშირებით ყოველთვის ხდება საზოგადოებისთვის ინფორმაციის გაზიარება.

ასოციაციის ამბობს, რომ თურქეთის მთავრობამ შეზღუდა ექსპორტზე გასატანი მედიკამენტების ჩამონათვალი და რაოდენობები.

• "ასევე მედიკამენტების ფასები გასული წლის დეკემბრის თვიდან საშუალოდ გაიზარდა 36,77 %-ით და თვეზე მეტია გაძვირებული ფასებით შემოდის, ამიტომ აღნიშნული ცვლილებები საქართველოს ბაზარზეც აისახება", — წერია განცხადებაში.
• მათი თქმით, ასოციაციის წევრებისათვის მიუღებელია და ემიჯნებიან ბიზნესის არაეთიკურ წარმოებას.
• აცხადებენ, რომ ასოციაციაში შემავალი ფარმაცევტული კომპანიები მუდმივად ზრუნავენ, მათ მიერ გაწეული მომსახურება შეესაბამებოდეს საერთაშორისო სტანდარტებს და მომხმარებლებს მიეწოდოს ხარისხიანი, უსაფრთხო და ეფექტიანი ფარმაცევტული პროდუქტი.
• განმარტავენ, რომ ასოციაციის ყველა წევრი გამოთქვამს მზადყოფნას სრული ინფორმაცია მიაწოდოს კონკურენციის სააგენტოს.
• "კიდევ ერთხელ ვაცხადებთ, რომ ფარმაცევტული ბაზრის ოპერატორებისთვის მიუღებელია მსგავსი ბრალდებები და გაუგებარია თუ რას ემსახურება ამ სახის განცხადებები. მით უმეტეს როდესაც ადგილი არ ჰქონდა კანონის დარღვევას", — წერს ასოციაცია.
• ამბობენ, რომ ემიჯნებიან უკანონო ქმედებებს და საქართველოს კანონის დაცვით აგრძელებენ ქვეყნის მოსახლეობის მაღალი ხარისხის მედიკამენტებით უზრუნველყოფას და კვალიფიციური მომსახურების გაწევას.