საბედნიეროდ, ხშირად — აღარ, მაგრამ ალბათ მაინც გაიგონებთ მავანის გულისტკენით ნათქვამს, რომ საქართველოში "გემოვნებიანი მუსიკა" არ იქმნება. გემოვნება, რასაკვირველია, სადავო ამბავია, მაგრამ ეს ნათქვამი, სიმართლე გითხრათ, მაინც გულზე მხვდება ხოლმე. თავად მუსიკოსი არ ვარ, მაგრამ როცა ნებსით ან უფრო მეტად უნებლიეთ, ჩემს საყვარელ შემსრულებლებს ხაზს უსვამენ, მწყინს.

თანამედროვე ქართული მუსიკა რაღაც მიმართულებით ალბათ მართლაც მოიკოჭლებს (პოპულარიზაცია), მაგრამ ამას ხელოვანების შემართებასა და ნამუშევრების ხარისხზე ვერ ვიტყვით. თუმცა, შეიძლება სწორედ არასათანადო რეკლამირების ბრალია, შესანიშნავი ქართველი მუსიკოსების ხმა რომ მსმენელთა ფართო მასებამდე ზოგჯერ ვერ აღწევს. ასე რომ, გადავწყვიტე, უამრავი არაჩვეულებრივი ქართული ბენდიდან რამდენიმე თქვენთვის გამეცნო. მათგან ზოგი ცნობილია, ზოგიც — ნაკლებად, მაგრამ თამამად შეიძლება ითქვას, რომ ყველა მათგანი გამორჩეულ მუსიკას ქმნის.

1. LOUDspeakers

ალტერნატიული როკის შემსრულებელი LOUDspeakers ქართველი მსმენელისთვის კარგად ნაცნობი და საყვარელი სახელია. ჯგუფი 2009 წელს დაფუძნდა და მას შემდეგ მისი სოლისტი ლევან ლაუდაძეა. სრული შემადგენლობით ბენდი მაყურებლის წინაშე პირველად ახალი ჯგუფების ფესტივალ Altervision/Newcomers-ზე წარდგა 2010 წელს და რჩეულებს შორისაც აღმოჩნდა. ჯგუფის პირველი სტუდიური ალბომი Lighthouse მსმენელში დიდი პოპულარობით სარგებლობს. განსაკუთრებული სიყვარული კი სიმღერას World in My Eyes ხვდა წილად — იუთუბზე კომპოზიციას უკვე 10 მილიონზე მეტჯერ მოუსმინეს.

2. Mellow

თუკი ქართული სერიალების ერთგული მაყურებელი ხართ, Mellow-ის მუსიკა აუცილებლად გექნებათ მოსმენილი. ნიკა ჩოხელის მიერ 2011 წელს ჩამოყალიბებული ჯგუფის სიმღერები ისეთ პოპულარულ სატელევიზიო სერიალებში გამოიყენეს, როგორებიცაა ჩემი ცოლის დაქალები და ხელოვნური სუნთქვა. ჩოხელმა ამავე სერიალების ორიგინალურ საუნდტრეკებზეც იმუშავა. Mellow-ს ამ დრომდე სამი მინიალბომი და რამდენიმე სინგლი აქვს გამოშვებული.

3. The Rylans

The Rylans შედარებით ახალი ჯგუფია, მაგრამ მის სოლისტს ქართველი მსმენელი კარგად იცნობს. მებო ნუცუბიძის წინა პროექტი, The BearFox (რომელმაც ასევე შესანიშნავი ჩანაწერები შექმნა), 2020 წელს დასრულდა. თუმცა, მებომ იმავე წელს გაიცნო სხვა მუსიკოსები, რომლებთან ერთადაც ახალი შემოქმედებითი ეტაპი დაიწყო და ასე ჩამოყალიბდა The Rylans. ჯგუფის სადებიუტო სიმღერას Voices in Your Head და მასზე გადაღებულ ვიდეოკლიპს დიდი გამოხმაურება მოჰყვა. მოწონება დაიმსახურა ბენდის პირველმა მინიალბომმაც, Ab Aeterno.

4. 4D Monster Lobsters

მაინცდამაინც ახალი ჯგუფი არ ეთქმის 4D Monster Lobsters-ს, რომელიც 2019 წელს ჩამოყალიბდა. სახასიათო მუსიკალური და ვიზუალური ესთეტიკით გამორჩეული ბენდი Tbilisi Newcomers 2019-ის გამარჯვებულიც გახდა. 4D Monster Lobsters, ძირითადად, ფსიქოდელიურ პოპს ასრულებს, თუმცა, ჯგუფის სიმღერებში ნაცნობ მელოდიებსაც აღმოაჩენთ. მათი მუსიკა კი, განსაკუთრებით, ალბათ Tamada-ის ფანებს მოეწონებათ. სხვათა შორის, ამ ორი უნიკალური მუსიკალური პროექტის კოლაბორაციაც შეგიძლიათ მოისმინოთ.

5. Bedford Falls

"ბენდის წევრები პოსტსაბჭოთა თაობას წარმოადგენენ, რომელიც ომით, სიღარიბითა და პოლიტიკური ქაოსით გახლეჩილ ქვეყანაში გაიზარდა", — ასეთ ტექსტს შეხვდებით Bedford Falls-ის ოფიციალურ აღწერაში. 2014 წელს ჩამოყალიბებული ჯგუფის მუსიკა ალბათ არის კიდეც საქართველოში მცხოვრები რიგითი ადამიანის ცხოვრების ერთგვარი ანარეკლი; მაჟორული მელოდიების მიუხედავად, ჯგუფის სიმღერების ტექსტები ისეთ რთულ საკითხებს შეეხება, როგორებიცაა ზრდასრულობის სევდა და პიროვნების გაუცხოება. ჯგუფის სადებიუტო ალბომი This Is Your House 2019 წელს გამოვიდა, გასულ წელს კი ბენდმა რჩეულ კომპოზიციებს კიდევ ერთ ალბომში მოუყარა თავი.

6. კოლექტივი

თქვენც გაინტერესებთ, სად გაქრნენ ეტრუსკები? ყოველ შემთხვევაში, ქართული ჯგუფისთვის კოლექტივი ეს ძალიან საინტერესო შეკითხვაა. ბენდის მუსიკაც სწორედ ასეთი "ახირებული" სტილისაა. კოლექტივი სრულიად შემთხვევით აღმოვაჩინე — როცა საღამოს შინისკენ გზაზე ქართული ალტერნატიული მუსიკის მიქსს ვუსმენდი სპოტიფაიზე. ჟანრობრივად კი ალბათ უფრო ინდიპოპია, მაგრამ ამას დიდი მნიშვნელობა არც აქვს — ჯგუფის მუსიკა იმდენად უნიკალური ჟღერადობისაა, რომ სამყარო ცოტა ხნის სწყდები კიდეც და მსგავსი დეტალები მნიშვნელობას კარგავს. როგორც ადრე ვთქვი, ისეთი სიმშვიდის, სიმყუდროვის და სინაზის მომგვრელია ეს ყველაფერი, როგორც დაღლილზე რბილ ლოგინში ჩაფლობა. კოლექტივს ამ დროისთვის ერთი ალბომი დამსწრე საზოგადოება და რამდენიმე სინგლი აქვს გამოშვებული.

7. არა

ყველაზე აკვიატებადი სიმღერებისთვის რომ ჯილდო გაიცემოდეს, ქართულ ბენდებში ალბათ არა აიღებდა. 10-წლიანი ისტორიის მქონე ჯგუფის შემადგენლობა სხვადასხვა დროს შეიცვალა, თუმცა, მისი სოლისტი დღესაც ზურა ჯავახიაა. ბენდის წევრია ასევე ნიკა ჩოხელი. არას აქამდე ორი ალბომი და ერთიც მინიალბომი აქვს გამოშვებული. 2022 წლიდან ბენდი მესამე სტუდიურ ალბომზე მუშაობს, რომლის პირველმა სინგლმა, თბილისი რუკაზე, მსმენელში დიდი პოპულარობა უკვე მოიპოვა და ტიკტოკის ტრენდადაც იქცა.

8. პანიკა

"ასე გვითხრეს, პანკს უკრავთო", — ამგვარად წარუდგენს ჯგუფი პანიკა მსმენელს საკუთარ თავს. 2016 წელს ჩამოყალიბებული ბენდი სწორედაც რომ პანკ-როკის/პანკ-პოპის შემსრულებელია. ჯგუფის პირველი და ამ დროისთვის ერთადერთი ალბომი შეტევა 2019 წელს გამოვიდა და 8 კომპოზიცია გააერთიანა. თუმცა, ამას გარდა, პანიკას რამდენიმე სინგლი აქვს გამოშვებული, მათ შორის, მარტოობის 5 დღე და ვიკიდებ ყველაფერს.

9. SKAZZ

პანკის მოყვარულებისთვის სასიხარულო აღმოჩენა იქნება SKAZZ-იც, რომელსაც ჯგუფზე მეტად დუეტი ეთქმის — ორი მუსიკოსისგან შემდგარი პროექტი ქუთაისიდან. მათი სიმღერები ახალგაზრდა მსმენელში დიდი მოწონებით სარგებლობს — განსაკუთრებით კი, Mdevari, რომელსაც მხოლოდ სპოტიფაიზე 230 ათასჯერ მოუსმინეს. 2022 წელს SKAZZ-მა ალბომი MEMORIAL გამოუშვა, რომელიც 7 სიმღერას აერთიანებს.

10. Killages

დასავლეთ საქართველოდან აღმოსავლეთში დავბრუნდეთ — ჯგუფი Killages ქალაქ რუსთავში ჩამოყალიბდა 2017 წელს. იმავე წელს ბენდმა Newcomers-შიც გაიმარჯვა და სხვადასხვა მასშტაბურ ფესტივალზე დაუკრა. ოთხი წევრისგან შემდგარი ჯგუფი, ძირითადად, ალტერნატიულ ჰიპ-ჰოპს ასრულებს. Killages-ის სადებიუტო ალბომი Original Brothers 2020 წელს გამოვიდა. ალბომიდან ერთ-ერთი სიმღერა Bottle Sip კი ნომინირებული იყო ელექტრონავტის დაჯილდოებაზეც წლის საუკეთესო ტრეკის კატეგორიაში.