ამის შესახებ პეტრ პაველმა BBC-სთან ინტერვიუში ისაუბრა.

რატომ არის მნიშვნელოვანი: პეტრ პაველი NATO-ს ყოფილი გენერალია.

  • პრეზიდენტად არჩევის შემდეგ მან საერთაშორისო მედიასთან პირველ ინტერვიუში უკრაინასა და დასავლეთის მიერ სამხედრო დახმარების გაწევის აუცილებლობაზე ისაუბრა.
  • განაცხადა, რომ უკრაინის მხარდაჭერის კუთხით, "შეზღუდვები თითქმის არ უნდა არსებობდეს".
  • რაც შეეხება, NATO-ში გაწევრიანებას, თქვა, რომ ქვეყანა ამისთვის "მორალურად და პრაქტიკულად მზადაა".
  • "უკრაინელი სამხედროები, ალბათ, ევროპაში ყველაზე გამოცდილები იქნებიან, უკრაინა იმსახურებს, იყოს დემოკრატიული ქვეყნების საზოგადოების ნაწილი".

დეტალები: ჩეხეთი პირველი დასავლური ქვეყანა იყო, რომელმაც უკრაინას ტანკები და საბრძოლო მანქანები გაუგზავნა.

  • როგორც პრეზიდენტმა აღნიშნა, ძალიან ცოტა ადამიანს შეეძლო წარმოედგინა, რომ დასავლეთის ქვეყნები უკრაინისთვის საბრძოლო ტექნიკის მიწოდებაზე მზადყოფნას გამოთქვამდნენ, თუმცა ახლა ეს რეალობაა.
  • "ჩვენ არ გვაქვს სხვა ალტერნატივა. თუ უკრაინას დახმარების გარეშე დავტოვებთ, დიდი ალბათობით, დამარცხებიან, თუ უკრაინა დამარცხება, ჩვენ ყველა წავაგებთ", — დასძინა მან.
  • პაველის თქმით, მას და სხვა ევროპელი ლიდერების ვალდებულებაა, სკეპტიკურად განწყობილ და ხშირ შემთხვევაში, შეშინებულ მოსახლეობას უკრაინის დახმარების საჭიროება აუხსნან.
  • "ჩვენი ქალაქები არ ნადგურდება რუსული არტილერიით და რაკეტებით, მაგრამ ჩვენი მომავალი შეიძლება განადგურდეს, თუ უკრაინას კონფლიქტის წარმატებით დასრულებაში არ დავეხმარებით".

გარდა ამისა, ჩეხეთის პრეზიდენტი ამბობს, რომ უკრაინაში გამანადგურებლების გაგზავნა, როგორებიცაა F-16, ტაბუდადებული საკითხი არაა.

  • თუმცა, როგორც ის განმარტავს, არ არის დარწმუნებული, რომ ამ თვითმფრინავების უკრაინისთვის მიწოდება იმ ვადებში მოხერხდება, რომ ეს ტექნიკა სასარგებლო იყოს კიევისთვის.
  • პაველი უკრაინა-რუსეთის მოლაპარაკებების საკითხსაც შეეხო და თქვა, რომ რუსეთის მხრიდან ამის "არავითარი ნიშანი არ ჩანს".