ცნობილი ამერიკელი მწერალი ტეილორ ჯენკინს რიდი ჟურნალ Time-თან ინტერვიუში ბისექსუალად დაქამინგაუთდა. არაერთი ბესტსელერის ავტორის თქმით, "ხანდახან რთული იყო იმ ფაქტთან შეგუება, რომ ხალხი ჰეტეროსექსუალ ქალად" ხედავდა. თუმცა, იდენტობასთან დაკავშირებული შეკითხვები მისთვის არახალია.

"მეკითხებოდნენ, გოგოსავით რატომ არ იცვამ, ფრჩხილებს რატომ არ იკეთებ, ასე რატომ ლაპარაკობ ან უფრო ჩუმი რატომ არ ხარო", — იხსენებს მოზარდობისდროინდელ გამოცდილებას რიდი, — "მერე გამოჩნდა ხალხი, რომელიც ასკვნიდა, ბიჭივით იმიტომ იცვამ, რომ გეი ხარო".

თუმცა, მწერლის თქმით, "გეისთან" თავისი გაიგივება უჭირდა, რადგან ორივე სქესის მიმართ გრძნობდა ლტოლვას: მისი პირველი სიყვარული ბიჭი იყო, მოგვიანებით კი, 20 წელს გადაცილებულს, ქალი შეუყვარდა. რიდი ამბობს, რომ ორივე შემთხვევაში გარშემომყოფებს მისი არჩევანი აეჭვებდა.

"90-იანების მიწურული იყო, ამიტომ, ბისექსუალობაზე არ ლაპარაკობდნენ და თუ ლაპარაკობდნენ, მხოლოდ დასაცინად", — ამბობს მწერალი, — "თუ ამბობდი რომ ბისექსუალი ხარ, ფიქრობდნენ, რომ ან ყურადღების მიქცევა გინდა, ან გეიდ ქცევის გზას დაადექი".

რიდის წიგნებში ქვიარ პერსონაჟებსაც ვხვდებით. მწერლის ალბათ ყველაზე პოპულარული რომანი, ეველინ ჰიუგოს შვიდი ქმარი, სულაც ორი ქალის სიყვარულის ისტორიაზეა. ქვიარ სასიყვარულო ხაზია ავტორის ახალ წიგნშიც Atmosphere, რომელიც სულ მალე გამოიცემა. დრო იყო, რისკიან, დრამატულ სიყვარულზე დამეწერაო, ამბობს რიდი.

Time-თან ინტერვიუში მწერალი ასევე აღნიშნავს, რომ პირადი ცხოვრების გასაჯაროება არ ხიბლავს, თუმცა, მის სექსუალობაზე უახლოესმა ადამიანებმა ყოველთვის იცოდნენ. მეტიც, მისი ქმარი, სცენარისტი ალექს ჯენკინს რიდი, სექსუალობას მრავალოთახიან სახლს ადარებს.

"ქალებისადმი ჩემი მიზიდულობა იდენტობის სახლის ერთ-ერთი ოთახია და ალექსს ესმის, რომ Atmosphere ჩემთვის სწორედ ამ ოთახში გატარებული დროა", — ჰყვება რიდი, — "ძალიან უხაროდა, რა მაგარია, რომ შენს ამ მხარეს ასე გამოხატავო. და დამეხმარა კიდეც, ეს წიგნი რაც შეიძლება რომანტიკული და მშვენიერი გამოსულიყო".

ტეილორის თქმით, იაზრებს, რომ კაცზე დაქორწინება მას "ჰეტეროსაშვის" იმ პრივილეგიებს აძლევს, რომლებსაც ზოგიერთი ქვიარ ქალი მოკლებულია.

ტეილორ ჯენკინს რიდის წიგნები მსოფლიოში 21 მილიონზე მეტ ეგზემპლარადაა გაყიდული და თარგმნილია 42 ენაზე, მათ შორის, ქართულად (ეველინ ჰიუგოს შვიდი ქმარი და დეიზი ჯოუნსი და ექვსეული).

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...